BAUKAU, STLTIMORLESTE.com – Funsionariu Suku neebe Governu rekruta destaka iha Suku Werumata, Postu Administrativu Laga, Munisipiu Baukau, seidauk halao servisu hodi atende komunidade sira, tanba seidauk fo kontratu.
Xefe Suku Werumata, Sabino Martins esplika, relasiona ho estabelese tan suku foun 3 iha Baukau mak Ministeriu Administrasaun Estatal (MAE) rekruta tan funsionariu suku nain 4 ba kada suku, ba objetivu atu apoiu servisu Administrasaun Suku nian. Nunee prosesu rekrutamentu iha nivel Munispiu remata iha loron 01 Setembru tinan nee, Autoridade Munisipiu Baukau koloka funsionariu nain 4 ba Suku Werumata atu apoiu uluk ho servisu voluntariu hodi hafoin hein despaisu husi Ministeriu, nunee destaka ona funsionariu nain 4 refere iha Suku Werumata, maibe lakohi halao servisu, tanba rajaun seidauk asina kontratu.
“Funsionariu nain 4 nee manan ona, maibe seidauk asina kontratu agora ami haruka nain 4 nee servisu lakohi, tanba sira seidauk asina kotratu, maibe hau hakatak ezije sira servisu, tanba taka sai ona sira nia naran, maibe sira lakohi servisu, tanba sira dehan seidauk legalidade,” hateten Sabino Martins ba STL iha Werumata, Segunda (29/09/2025).
Nia sublina, kestaun seidauk fo kontratu ba funsionariu nain 4 refere fo impaktu ba atendimentu suku nian, tanba bainhira iha sidadaun sira trata dokumentus ho emerjensia Autoridade Suku ba hamaus mak foin funsionariu nain 4 refere marka prezensa iha Sede Suku hodi atende komunidade sira.
Sabino argumentu, tuir lo-loos funsionariu nain 4 refere la prezisa hatudu jestu refere, tanba estabelese Suku foun refere nia parte esforsu ho voluntariu too rezultadu final harii Suku Werumata iha Postu Laga, maibe iha faze atendimentu funsionariu nain 4 refere ho rajaun nunee.
“Foin lalais nee ami enkontru ho PAM iha Postu Administrativu Laga hau aprezenta, maibe PAM seidauk responde,” Sabino komenta.
Lideransa Komunitariu nee katak, preokupasaun refere hatoo ona ba Prezidente Autoridade Munisipiu Baukau Veneranda Lemos liu husi enkontru neebe realiza iha Postu Administrativu Laga foin lalais nee, maibe seidauk fo resposta.
Tanba nee husu Autoridade Munisipiu Baukau atu aselera ona kontratu ba funsionariu Suku nain 4 neebe destaka iha Suku Werumata, nunee bele ativu ona iha edifisiu Suku fo atendimentu ba komunidade sira bainhira prezisa trata dokumentus ruma.
Tuir informasaun neebe STL asesu husi Autoridade Munisipiu Baukau, funsionariu nain 4 refere sei asina kontratu iha loron 01 Outubru tinan nee.
Jornalista: Tomas Reis
Editora: Domingas Gomes
