DILI, STLTIMORLESTE.com – Prezidente Republika (PR), Jose Ramos Horta promulga ona lei pensaun mensal vitalisia neebe hatoo husi Parlamentu Nasional (PN).
Prezidente Republika Jose Ramos Horta hatete, ohin hamriik nuudar Xefe Estadu, tula iha nia kabas responsabilidade neebe susar tebes atu promulga ou la promulga dekretu parlamentar No. 21/2025, neebe hamonu pensaun vitalísia no regalia sira seluk neebe fo ba eis-deputadu sira, eis-membru governu sira no eis titulares. Desizaun ida nee hakiduk ba kotuk husi loron 20 Maiu 2002.
“Oras nee daudaun atu promulga lei nee hau reafirma hau nia vontade hau nia konfia vontade politika povu Timor Leste nia ba ita hotu hotu nia kapasidade koletivu nuudar komunidade nuudar povu nuudar nasaun para infrenta dezafiu sira neebe sempre mosu durante ita nia istoria ba vida estadu no vida nasaun sempre iha dezafiu oin-oin,” dehan PR Horta ba jornalista iha Palasiu Prezidensial Nicolao Lobato, Bairo Pite, Segunda (29/09/2025).
Prezidente Republika hatete, ida nee laho duvida, maka momentu signifikativu ida iha joven demokrasia iha istoria, maibe dimensaun edukativa no koretiva, koretiva tanba lei anterior nee kurizi duni lei ba kotuk neebe viola prinsípiu ekuidade, maibe konsekuensia mos iha buka kurizi lei ida ke ladiak neebe fo benefisiu deit ba grupu ida. Kuandu hasai ka kurizi bele provoka fali injustisa ruma tan afeta ba família timoroan balun nia moris. Lei ida-nee hetan aprovasaun husi PN ho unanimidade partidu sira hotu hotu vota absoluta ba lei ida nee.
Iha biban nee Xefe Estadu hakarak fo hanoin katak Konstituisaun Republika, neebe aprova iha 2002, laiha consensus husi partidu palun laiha partidu abstae no nein Planu Estratejiku Dezenvolvimentu (2011-2030), lahetan uniminidade. Nomos fronteira maritima 2018 lahetan konsensus.
Maibe lei ida nee, reflete reprezentante povu hotu-hotu iha parlamentu no vontade Governu Konstitusional da-9 nia vontade, preveleizu ba eis titulares sira, eis governante, eis deputadu sira no lei nee mos reflete sentimentu parte boot ida husi sosiedade, inklui líder polítiku sira rona durante kampaña eleitoral sira 2023 nian, partidu balun lider partidu balun promete ona atu halakon ou hamate lei pensaun vitalísia nian.
“Hau promulga lei ida ohin ho refleksaun klean, ita hatene lei ida nee sei afeita impaktu ba vida lider balun, militante neebe tinan lubuk ida nia laran sira mos fo kontribuisaun ba luta libertasaun independensia, lei nee lahasai lahamate direitus ba sira neebe veteranus, veteranus neebe serve governu, serve parlamentu, eis Primeiru Ministru i laos sira nia direitu enkuantu veteranus, maibe sira nia direitu mos hanesan konstituisaun fo ba hetan reforma ida dignu no justu. Hau koalia ona ho Primeiru-Ministru dala rua kona-ba asuntu ida-nee buka koalia ho Prezidente Rekursu, Prokurador Jeral Republika, Provedor Justisa no Direitus Umanus, Ministru Asuntu Veteranu, Xefe Estadu Maior F-FDTL, no hau-nia Asesor Superior, Jeneral Lere, joven universitariu sira, no membru rezistensia sira,” dehan nia.
Xefe Estadu hatete, dalan ba demokrasia dala ruma difisil no taka ho susar. Nasaun ida boot laos deit halo reforma, atu halo reforma, maibe mos ho umanidade neebe nia trata nia sidadaun sira, inklui sira neebe serbí estadu.
Prezidente ohin promulga lei ida-nee, reafirma konfiansa iha povu nia maturidade polítika no iha kapasidade koletiva atu hasoru dezafiu sira neebe hasoru iha etapa hotu-hotu.
Jornalista: Emerenciana Pinto
Editora: Domingas Gomes
