DILI, STLTIMORLESTE.com – Tribunal Judisial Primeira Instansia Dili halao julgamentu ba arguida ho inisial OGM hanesan inan, tanba halo agresaun hasoru ofendida PRM hanesan oan.
Tuir faktus katak, ofendida PRM hanesan arguida nia oan, no sira hela iha Atara Atsabe.
Iha loron 20 fulan Setembru, ofendida ba eskola maibe, fila mai uma tarde. Tanba nee, arguida nervoju lori liman tuku dala rua kona iha ofendida nia rentos, no kontinua foti masa jergen ida baku dala rua ba iha ofendida nia kanuruk, no liman basa iha hasan dala rua.
Banhira arguida baku tiha ofendida, halo ofendida sente tauk hodi halai tiha ba ofendida nia tian nia uma.
Konsekuensia husi arguida nia hahalok nee, halo lezada sente moras iha fatin neebe atinjidu.
Tanba nee maka Ministeriu Publiku akuza arguida komete krime Violensia Domestika ho Forma Ofensa Integridade Fisika Simples neebe previstu iha artigu 145 husi Kodigu Penal.
Hatan ba akuzasaun neebe iha arguida deklara, momentu neeba arguida baku duni lezada, tanba lezada fila husi eskola mai uma tarde.
Arguida mos rekonhese ofendida tauk arguida hirus, tanba nee halai tiha ba ofendida nia tian. No arguida deklara tan ba hato keixa iha Polisia, ofendida nia avo maka lori ofendida ba.
Arguida deklara, hahu husi neeba to mai agora la iha tan problema ruma, no arguida arepende tebes ba hahalok nee, no promete sei la halo tan hahalok nee iha futuru.
Hare arguida konfensa imparsial ba iha faktus, tanba nee Tribunal deside hodi presinde la rona deklarasaun husi ofendida.
Iha faze alegasaun, Prokurador Ricardo Leite husu Tribunal atu aplika pena multa ba arguida, atu iha futuru arguida labele halo tan krime refere.
Enkuantu Advogadu Estajiadu husu Tribunal, atu aplika pena neebe justu.
Rona tiha alegasaun, adia ba loron seluk hodi rona desizaun.
Audensia julgamentu nee, prezide husi Juiz Ivan Patrocenio, Ministeriu Publiku reprezenta husi Prokurador Ricardo Leite, arguida hetan asistensia legal husi Advogadu Privadu estajiadu.
Jornalista: Terezinha De Deus
Editora: Domingas Gomes
