DILI, STLTIMORLESTE.com – Ministru Justisa, Sergio Hornai hatete, propriedade estadu neebe okupa husi sidadaun sira iha obrigasaun atu halo arendamentu ba iha estadu.
Ministru Justisa, Sergio Hornai hatoo ba jornalista bainhira remata halo enkontru ho Prezidente Republika Jose Ramos Horta, iha Palasiu Prezidensial Nicolau Lobato, Bairru Pite, Tersa (30/09/2025).
Nia hatete, lei anterior hatete eis titulares, eis membru governu, eis membru Governu soberania estadu sira iha rajaun atu hela, tanba sira simboliza instituisaun estadu orgaun soberania nia.
“Ba sira neebe hanesan membru governu mais latama iha lei anterior nia prosedimentu, sira tenke sujeita ba iha arendamentu hira nee hotu, tanba ita nia dekretu lei numeru 19/2004 neebe koalia konaba rejime juridiku ba iha efeitasaun ba iha arendamentu nia katak, propriedade estadu neebe okupa husi sidadaun sira hetan ona selebrasaun kontratus sira iha obrigasaun atu halo arendamentu efikasaun valor neebe mai husi diresaun nasional serbisu kadastrais iha seksaun ida proprio para atu halo avaliasaun kada lokalizasaun do terenu i kustu arendamentu kada metrus kuadradus nee ita atu fiksa ho hira regularizado iha nia lei no dekretu lei numeru 19/2004 neebe foin dadauk halo alterasaun balun,” dehan Ministru nee.
Nia afirma, foin dadaun halo ona alterasaun balun dekretu lei konaba rejime juridiku duminiu estadu nia iha situasaun rua, ida mak ba dominiu privadu estadu nomos ba iha dominiu publiku estadu nia. Kuandu uza propriedade refere obrigasaun atu bele halo selebrasaun kontratu arendamentu ou halo lisensa ka konsensaun ho governu.
Nia hatutan, ba eis titulares sira hela iha uma estadu labele selu, tanba lei anterior fo hela biban ba iha eis titulares sira atu bele hela katak, sira iha uma ida eskritoriu hakarak ka lakohi sira tenke hela iha fatin refere.
Jornalista: Emerenciana Pinto
Editora: Domingas Gomes
