DILI, STLTIMORLESTE.com – Tasi-Tolu rai Estadu, tanba nee Governu iha planu sei halo estadiun footbal iha fatin refere, maibe sei rona mos opiniaun publiku.
Kestaun nee hatoo husi Ministru Justisa, Sergio Hornai ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Tersa (30/09/2025).
“Rai nee dominiu provadu estadu, tenke iha klareza ida lo-loos, rai nee dominiu privadu estadu tuir ita nia lei numeru 13/2017, iha neeba artigu define klaru koalia kona-ba ida nee, rai dominiu estadu no rai neebe dominiu publiku estadu, ita konsiente ba ida neeba, ita mos lakohi atu bele rai nee sai hanesan terenu ba liur presiza dezenvolve objetu nee atu bele kontribui ba sosiedade ida nimaika liu, ita mos tenke prezerva buat balun iha neeba, kontein buat balun, kultura, politika, ekonomika, relijioza, buat sira nee hotu ita halo komplikasaun ida ke diak ba ita, no la fo perturvasaun ba ita nia beleza ka destrui ita nia beleza iha ambiental nee rasik,” dehan Ministru.
Ministru hatete, nia nuudar Jurista labele haree ida nee, maibe ema neebe iha kbiit haree hodi bele fo sira nia paraser.
Maske rai estadu maibe rai Tasi-Tolu hanesan fatin istorika restaura indepedensia 2002 nomos fatin nee Papa nain rua vizita iha fatin nee, ikus Governu planu halo fali estadiu, hatan ba kestaun nee ministru hatete, Governu konsidera hotu opiniaun sira nee.
“Ita konsidera nafatin, ita sosiedade nee dinamika liu neste momentu rai sira nee jere husi Governu ka estadu, Governu hanesan estadu hamriik atu bele halo jestaun ba iha teras tetu ba sirkuntasia hotu entidade hotu nia preokupasaun hili ida neebe mak terbaik ba ita nia komunidade, ita nia sosiedade para labele iha konflitu, ida nee mak esensial liu,” katak Ministru.
Oinsa pozisaun Governu nia, mantein halo estadiun ka oinsa? Hatan ba kestaun nee Ministru hatete, nee rai estadu, Governu bele administra.
Aleinde halo alargamentu karik komunidade hira mak afeitadu? Hatan ba kestaun nee Ministru hatete, se komunidade afeitadu sei halo tuir medida sira neebe mak iha halo dialogu ho komunidade autoridade lokal nomos OPS Suku no sira neebe efeitadu fo solusaun ba problema.
Jornalista: Emerenciana Pinto
Editor: Xisto Mendonça
