DILI, STLTIMORLESTE.com – Komando Polisia Nasional Timor Leste (PNTL) Munisipiu Dili hein keixa husi vitima sira relasiona ho kazu konfrontu tuda malu iha festa serimonia kazamentu rua iha Metiaut, Postu Administrativu Kristu Rei, Munisipiu Dili, neebe akontese foin daudaun.
Komandante PNTL Munisipiu Dili, Superintendente Xefi Polisia Orlando Gomes dehan, foin dadauk iha akontesementu iha Metiaut, iha serimonia festa kazamentu rua, ida iha fatin salaun Paradise no ida Nelio Restaurante.
“Kazu nee akontese iha festa kazamentu nee, iha neeba joven sira provoka malu, depois konsege fatin rua nee tuda malu hodi rezulta sasan barak mak hetan estragus,” hatete nia ba jornalista sira iha Komando Jeral PNTL, Tersa (30/09/2025).
“Ita nia task force sira apoiu husi parte BOP sira ba too kedas fatin akontesimentu nee no halo atuasaun no normaliza situasaun iha Metiaut,” nia esplika.
Nia informa, prosesu ba kazu konfrontu nee parte PNTL seidauk bele prosesa ba oin, tanba too agora vitima sira seidauk mai hatoo keixa ba iha parte PNTL hodi prosesa ba oin.
“Too agora Esquadra Cristu Rei seidauk simu keixa, tanba nee nafatin hein hela vitima sira hatoo keixa hodi halo prosesu ba oin no buka tuir suspeitu sira”, nia relata.
Nia haktuir, iha konfrontu tuda malu malu nee rezulta kadeira balu rahun no sasan seluk mos rahun, tanba nee esquadra Cristu Rei nafatin hein keixa husi vitima sira.
Jornalista: Jeniche da Costa
Editora: Domingas Gomes
