BAUKAU, STLTIMORLESTE.com – Ekipa husi Ajensia Dezenvolvimentu Nasional (ADN) sobu hikas projetu reabilitasaun estrada husi Suku Loilubu ba Postu Venilale no Fatumaka, tanba kompanhia utiliza material konstrusaun neebe bandu.
Tuir informasaun neebe STL asesu, iha loron 30 Setembru 2025 ekipa husi ADN kompostu Enjenheiru ADN destakadu Munisipiu Baukau hamutuk ho Enjenheiru Laboratoriu ADN nian sobu projetu reabilitasaun estrada diresaun, Fatumaka-Loilubu-Venilale, tanba parte kompanhia implementador utiliza sementi ho marka Kaito neebe seidauk hetan aprovasaun husi parte kompetente hodi utiliza sementi ba projetu konstrusaun sira iha Timor Leste.
Hafoin sobu, enjenheiru sira husu parte kompanhia transporta sai kedas sementi refere husi fatin implementasaun projetu no truka emidiata sementi refere ho sementi sira neebe hetan ona aprovasaun husi parte kompetente.
Projetu reabilitasaun estrada refere implementa husi kompanhia Glory Entreprise, Golden Way no Joli Toni Unipesoál Lda utiliza sementi neebe seidauk hetan rekonhesimentu ka aprovasaun husi autoridade sira iha projetu konstrusaun sira bandu tanba razaun krusial sira mak hanesan, sementi refere forsa neebe la serteza, la koko iha laboratoriu bele iha kompozisaun kimika fizika neebe la tuir padraun sira, risku ba estrutura edifisiu sira neebe frajil ka fasil atu rahun.
Jornalista: Tomas Reis
Editor: Tomas Reis
