Deskonfia Estudantes Sunu Livru iha Area Eskola 10 Dezembru

DILI, STLTIMORLESTE.com – Deskonfia estudantes balun husi Eskola Baziku Central (EBC) 10 Dezembru Komoro sunu livru iha area eskola, akontesimentu nee akontese iha loron Sabadu foin lalais nee.

Diretor ESJ 10 Dezembru Komoro, Manuel Verdial dehan, laos ema deskonhesidu mak sunu lae, tanba iha evidensia, labarik sira SMP nee iha loron Sabadu nee iha extra, tanba nee dader tuku 8:00 nee sira iha ona eskola, SMP mak okupa, nee duni estudantes SMP sira mak ba dader iha eskola, labarik sira kuaze halo tiha ona, polisia kaer toman, maibe ida nee sira toman ona ho buat ida nee.

“Ita prega ona ho triplek, maibe sira sobu hodi tama ba iha laran, sira estraga livru sira iha armari laran nee foti soe namkari tun sae, depois mai fali iha liur sira sunu halimar fali, maibe ita nian ema sira neebe mak reboka hela moru eskola nee mak kaer toman hodi hamate fali ahi nee, depois labarik sira nee halai,” dehan Manual ba jornalista STL, Tersa nee (30/09/2025).

Nia afirma, ohin hotu-hotu ba iha eskola, husi munisípiu no nasional, no aban sira sei ba hatoo kronolojia husi akontesimentu nee ba iha polisia eskuadra Aimutin, sunu nee estudantes husi Ensinu Baziku, tanba sira nee eskola dader, iha loron Sabadu nee sira iha atividades extra kurikuler ninia.

“Laos estudantes hotu, maibe estudantes balun deit, tanba eskola la orienta ema atu halo krimi, maibe balun mak halo nunee, tanba nee husi eskola tenke buka tuir ida nee, atu nunee fo atensaun no moral, tanba livru nee ba ita nian futuru, akontesimentu iha loron Sabadu tuku 8:00 ou 9:00 nunee,” tenik nia.

Manuel hatutan, aban nee Diretor ESJ 10 Dezembru no Diretor EBC 10 Dezembru no adjuntu sira nain haat sei hatoo informasaun kona-ba kronolojia husi akontesimentu nee ba iha parte PNTL eskuadra Aimutin ninia, atu nunee bele klarifikasi buat nee lo-loos, tanba livru hirak nee sira sunu fali iha varanda biblioteka ninia.

Bainhira STL hatun notisia nee seidauk halo konfirmasaun ho parte Diretor Ensinu Baziku Central 10 Dezembru Komoro, Calistro A.Guterres.

Jornalista: Jacinta Sequeira
Editor: Xisto Mendonça