DILI, STLTIMORLESTE.com – Prezidente Republika (PR), Jose Ramos Horta sei simu Doutor Honoris Causa iha nasaun Portugal, iha fulan ida nee nia laran.
Prezidente no Laureadu Nobel ba Pas, Jose Ramos Horta halao vizita privadu ida ba Portugal husi loron 3 too loron 7 Outubru 2025.
Vizita nee sei hahu iha Lisboa. Iha loron 6 Outubru, Prezidente Ramos Horta prezide serimonia kondekorasaun Medalha Orden Timor Leste nian iha kategoria Grau Kolar, Grau Medalha, Medalha Meritu, no Sertifikadu Rekonhesimentu ba distintu eis-membru sira Asembleia Nasional Portugal nian no individual sira entre simpatizante dahuluk no dedikadu liu ba Timor Leste nia luta ba independensia.
Tuir Dekretu Prezidente Republika Nu. 90/2025, tuir mai nee mak pesoal sira neebe simu kondekorasaun ho Grau Kolar Orden Timor Leste nian Dr. Jose Miguel Nunes Anacoreta Correia, Eis Deputadu Partidu CDS/PP. Dr. Carlos Manuel Natividade da Costa Candal (falesidu iha loron 18 fulan Juñu tinan 2009), Fundador no Eis Deputadu Partidu Sosialista (postumu).
Tuir Dekretu Prezidente Republika No. 117/2024, Prezidente kondekora Grau Medalla Orden Timor-Leste nian ba Sr. Paulo Ferraz (Jornalista).
Tuir Dekretu Prezidente Republika No. 100/2025, Prezidente kondekora Medalla Meritu no Sertifikadu Rekoñesimentu ba Tenente-Jeneral Carlos Manuel Mourato, eis-Komandante-Xefi Guarda Nasional Republikana.
Reflete kona-ba serimonia, Prezidente Ramos Horta hateten liu husi Komunikadu neebe STL asesu husi media Prezidensia Republika kuarta (01/10/2025) hatete, prezidente fo ondra ba solidaridade ba distintu personalidade portugues sira.
“Ohin, ita fo onra ba solidariedade neebe boot husi distintu personalidade portuges sira nee. Sira nia advokasia dahuluk iha koredores sira demokrasia Portugal nian sai hanesan buat apoiu vital ida ba ita-nia kauza, no rekoñesimentu ida nee sai nuudar testemuña ida ba lasu sira neebe dura entre ita-nia nasaun sira,” dehan PR Horta.
Hafoin serimonia dekorasaun, iha loron 6-7 Outubru, Prezidente Ramos-Horta sei halo viajen ba sidade Braga.
Prezidente Ramos-Horta sei simu onra akademika neebe prestijiozu liu Doutor Honoris Causa husi Universidade do Minho. Serimonia neebe prezide hosi Profesor Luís Aguiar Conraria, rekoñese Prezidente nia kareira distintu no ninia kontribuisaun esepsional sira ba pas, demokrasia, no dezenvolvimentu Timor Leste nian.
Prezidente Portugal nian, Sua Exelensia Profesor Dr. Marcelo Rebelo de Sousa, sei marka prezensa iha serimonia nee. Reflete kona-ba signifikadu onra nee, Prezidente Ramos Horta hateten.
“Onra ida nee husi Universidade Minho laos deit distinsaun pesoal ida, maibe rekonhesimentu ida ba reziliensia povu Timor-oan nian no lasu klean, neebe labele kotu neebe ita partilha ho Portugal. Husi ita nia istoria partillada too ita nia futuru komun, vizita ida nee hanesan testemuña ida ba parseria ida neebe harii iha respeitu ba malu no kompromisu komun ba demokrasia no progresu umanu,” dehan Horta.
Ba viajen ida nee ba Portugal Prezidente Ramos Horta kobre kustu hotu pesoalmente. Prezidente sei sai husi Portugal iha loron 8 fulan-Outubru no sei too iha Timor Leste iha loron 9 Outubru 2025.
Jornalista: Emerenciana Pinto
Editor: Xisto Mendonça
