DILI, STLTIMORLESTE.com – Timor Leste (TL) adere full ba membru ASEAN iha fulan Outubru fo oportunidade atu investe iha kuidadu ekonomia no igualdade jeneru.
Kestaun nee hatoo husi Chief, Gender Equality and social Inclusion section, Social Development Division, Cai Cai liu husi nia diskursu iha Novu Turizmu, kuarta (01/10/2025) hatete, TL oras nee prepara aan tama iha membru full ASEAN iha semana oin mai, ida nee fo oportunidade ba TL nia prioridade ba domestika kuidadu ekonomia no ba igualdade jeneru.
“TL nia preparasaun tama daudaun iha ASEAN iha semana oin mai, ida nee reflete duni esforsu tinan barak husi nasaun ida nee ninia, no husi kooperasaun no laran diak, ida nee susesu boot ba TL nomos ba komunidade ASEAN, ida nee mos oportunidade ida atu alinea Timor Leste nia propriedade domestika sira partikularmente iha kuidadu ekonomia ho nasaun seluk iha ASEAN ba protesaun sosial igualdade jeneru nomos kresimentu inkluzivu,” dehan Chief.
Cai Cai hatete, sira mos orgulhu tebes hodi fo deklarasaun apoiu Timor Leste ba ASEAN atu hametin kuidadu ekonomia inklui liu husi dezenvolvimentu empoderamentu ba ekonomia.
“Objetivu ba oin fornese ona mata dalan pratiku sira nomos vizaun komum ida atu bele fo inspirasaun sira, tanba ida nee reflete ita nia komitmentu atu halo kolaborasaun ho kooperasaun metin ba oin, no lokaliza pozisaun kuidadu ekonomia nia ba dezenvolvimentu,” dehan nia.
Nia hatete, bainhira haree ba oin liu husi dialogu nee oportunidade forte tebes atu kontinua, momentu ida nee oportunidade ida atu iha konsiensia entre ministeriu atu fahe pratika sira no buka solusaun diak ba moris neebe halao iha servisu kuidadu ekonomia nia, tanba ida nee jornada ba tempu naruk nia nomos ba jerasaun sira ba oin.
“Bainhira ita hahu prepara aan servisu hamutuk ho familia, no ami iha komitmentu nafatin atu apoiu TL hodi harii espasu neebe efikas nomos hasae asaun sira hodi responde oinsa mak kuidadu ekonomia nee bele implementa, tanba nee mak ita tenke servisu hamutuk nafatin iha Governu no sosiedade sivil, setor privadu nomos komunidade internasional sira atu asegura katak kuidadu ekonomia nee laos sai todan ida ba ita laos sai naha ba ita,” hakotu nia.
Jornalista: Emerenciana Pinto
Editor: Xisto Mendonça
