DÍLI, STLTIMORLESTE.com – Falta infraestrutura no fasilidade eskolar kontinua sai obstákulu ba melloramentu kualidade ensinu iha Timor-Leste.
Preokupasaun ne’e hato’o husi dosente Fakultade Siénsia Sosial (FCS), Camilo Ximenes Almeida, ba STL, iha Kampus Universidade Nasionál Timor Lorosa’e (UNTL), Segunda-feira (9/11/2026).
Camilo Almeida afirma katak, kualidade edukasaun la depende de’it ba rekursu umanu, maibé presiza mós infraestrutura adekuada iha eskola primária no sekundária.
Nia esplika katak, infraestrutura eskolar importante atu suporta dosente sira-nia knaar no fasilita estudante sira hetan ambiente aprendizajen ne’ebé apropriadu.
“Ita ko’alia kona-ba kualidade ensinu, la sukat de’it husi rekursu umanu ne’ebé sufisiente, maibé presiza haree mós ba infraestrutura,” nia dehan.
Nia hatutan katak, iha realidade, dosente sira dala barak hasoru difikuldade atu hala’o prosesu aprendizajen tanba falta fasilidade eskolar.
Ezemplu mak kadeira no meza ne’ebé la sufisiente ba estudante sira, inklui infraestrutura bee ne’ebé seidauk disponivel iha eskola balun.
Kondisaun hirak-ne’e bele hamosu difikuldade ba estudante sira no afeta diretamente prosesu aprendizajen.
Nia konsidera katak, maski autoridade kompetente kontinua rekruta dosente foun, problema infraestrutura no fasilidade eskolar sei sai dezafiu ba kualidade edukasaun.
Tanba ne’e, nia subliña katak, dezenvolvimentu edukasaun la’ós de’it aumenta númeru dosente, maibé presiza hametin infraestrutura no fasilidade eskolar.
Nia defende katak, investimentu iha infraestrutura eskolar importante atu kria ambiente aprendizajen ne’ebé di’ak no apoia estudante sira-nia dezenvolvimentu.
(joa)
