DÍLI, STLTIMORLESTE.com – Hospital Nasionál Guido Valadares (HNGV) konfirma falta ai-moruk esensiál balun, enkuantu Ministériu Saúde (MS) afirma katak stok ai-moruk iha Armazén Nasionál sei disponivel.
Diretór Apoiu Servisu Diagnóstiku no Terapeutiku HNGV, Vidal de Jesus Lopes dehan katak, hospitál ne’e enfrenta duni falta ai-moruk no ekipamentu importante balun.
“Honestamente, ita enfrenta duni stock out, tanba kestaun ema nia vida no moras. Ami rekuñese duni katak HNGV enfrenta stock out,” dehan Vidal ba jornalista iha nia knar Fatin HNGV Bidau, Segunda (09/11/2026).
Nia esplika katak, HNGV enfrenta limitasaun stock ba ai-moruk no ekipamentu esensiál hamutuk 460 tipu, inklui kategoria vital, esensiál no nesesáriu.
Vidal hateten katak, responsabilidade atu sosa, rai no distribui ai-moruk mak Institutu Farmásia Produtu Medikamentu (INFPM) nia kompeténsia, enkuantu HNGV foka ba atendimentu pasiente.
“INFPM mak iha kompeténsia atu buka, sosa, rai no distribui. HNGV hanesan utilizadór ne’ebé fó atendimentu ba pasiente,” nia afirma.
Nia hatutan katak, HNGV halo pedidu ai-moruk kuaze loron-loron, semana-semana no fulan-fulan, inklui liuhusi komunikasaun iha grupu WhatsApp.
Maski nune’e, Vidal dehan, falta ai-moruk kontinua afeta servisu ospitál, no obrigadu uza orsamentu emerjénsia atu sosa ai-moruk ba nesesidade loron ida ka rua.
Iha parte seluk, Ministra Saúde, Élia dos Reis Amaral, rejeita alegasaun katak Armazén Nasionál enfrenta falta stock ai-moruk.
“Ita haree hela prosesu dijitalizasaun, stock out laiha. Ai-moruk ne’ebé tama mai sei distribui, la’ós atu hela permanente iha armazén,” dehan Élia iha Parlamentu Nasionál.
Maibé, situasaun iha sentru saúde sira hatudu dezafiu kona-ba disponibilidade ai-moruk ba pasiente.
Pasiente Fátima Luzia Pereira lamenta tanba, depois konsulta iha Sentru Saúde Formosa, médiku haruka nia sosa ai-moruk iha farmásia privadu.
“Agora dadaun hau osan la iha atu sosa, maibé hau nia oan presiza tebes. Hau tenke deve ka impresta osan husi ema seluk atu sosa ai-moruk,” nia relata.
Nia esplika katak, nia lori oan ba konsulta tanba sofre moras bainhira atu hasee bee ki’ik, maibé ai-moruk ne’ebé médiku hakerek la disponivel iha farmásia sentru saúde.
Fátima mós relata katak, nia rasik sofre moras feto-nian, maibé tenke sosa ai-moruk iha farmásia privadu tanba falta stock.
Nia husu Ministériu Saúde atu asegura disponibilidade ai-moruk esensiál, inklui paracetamol, iha sentru saúde sira.
Pasiente seluk, Maria Marciana Lemos, mós hasoru situasaun hanesan bainhira ba konsulta tanba isin-katar, maibé médiku fó reseita de’it tanba ai-moruk la disponivel.
(dom)
