DILI, STLTIMORLESTE.com – Ekipa Tekniku Diresaun Rekursu Umanu Nasional husi Ministeriu Edukasaun (ME), servisu hamutuk ho Komisaun Funsaun publiku (KFP) no Institutu Nasional Seguransa Sosial (INSS), sei identifika profesores moras prelongada ka ho tempu naruk iha eskola sira Munisípiu Dili.
Diretor Nasional Rekursu Humanu iha ME, Joao Amaral dehan, konaba identifika profesores moras ho tempu naruk agora falta Dili deit ona, Munisipiu seluk remata ona.
“Dili nee ami sei haree fali tempu, tanba ami sei haree fali horseik ita fo ona pose ba ita nian Professor 187 nee. Nee duni Segunda ba oin mak ami haree, hodi ami haruka dadaun lista ba iha Munisipiu, atu nunee sira bele informa ona,” dehan nia ba STL, Kuarta (01/10/2025).
Joao haktuir, data atu identika Professor moras prelongada iha Dili seidauk hatene, maibe sira hamutuk 258. Husi numeru nee 208 mak verifika ona, hela deit 50 iha Munisípiu Dili ninia, nee mai husi nibel eskolaridade.
Iha fatin seluk Diretor Servisu Edukasaun Munisipiu Manatuto, Patricio da Cruz Quintao hatete, profesores neebe mak moras prelongada nee dadus haruka ba ona iha rekursu umanu nasional, atu nunee bele haree asuntu ida nee. Tanba professores balun neebe ho kondisaun moras, nee sira labele ativu hanorin estudantes sira iha sala de aula.
Nunee mos Diretor Servisu Edukasaun Munisipiu Liquica, Julio da Silva dehan, profesores iha eskola sira Munisipiu Liquica balun moras no la hanorin estudantes sira iha eskola, tanba nee ba oin presiza aumenta professores, liu-liu ba eskola neebe ninia profesores ho kondisaun moras no balun atu tama ba idade reforma ninia.
Jornalista: Jacinta Sequeira
Editora: Domingas Gomes
