DILI, STLTIMORLESTE.com – Tribunal Judisial Primeira Instansia Dili liu husi desizaun ikus deside hodi aplika pena admoestasaun ba arguida ho inisial OMG hanesan inan, neebe halo agresaun hasoru lezada ho inisial PRM hanesan oan.
Iha desizaun final neebe halao iha Kuarta (01/10/2025), Juiz prosesu Ivan Patrocenio katak, iha sala julgamentu laran lezada konfesa ba faktus, katak arguida baku duni lezada, tanba lezada ba eskola no fila mai uma tarde.
Tribunal mos deklara, depois de akontese tiha lezada kontinua hela hamutuk ho arguida, no husi neeba to mai agora la akontese tan violensia.
Tribunal mos hare katak, arguida arepende ba nia hahalok promete sei la halo tan hahalok nee iha futuru, tanba nee tribunal deside hodi aplika pena admoestasaun ba arguida.
Tribunal esplika ba arguida katak, pena admoestasaun hanesan fo chamada ida ba iha arguida, atu labele pratika tan krime nee, se pratika tan krime nee iha futuru sei hetan kastigu seluk.
Antes nee iha faze alegasaun, Prokurador Ricardo Leite husu Tribunal atu aplika pena multa ba arguida, atu iha futuru arguida labele halo tan krime refere.
Enkuantu Advogadu Estajiadu husu Tribunal, atu aplika pena neebe justu.
Tuir faktus katak, ofendida PRM hanesan arguida nia oan, no sira hela iha Atara Atsabe.
Iha loron 20 fulan Setembru, ofendida ba eskola maibe, fila mai uma tarde.
Tanba nee, arguida nervoju lori liman tuku dala rua kona iha ofendida nia rentos, no kontinua foti masa jergen ida baku dala rua ba iha ofendida nia kanuruk, no liman basa iha hasan dala rua.
Banhira arguida baku tiha ofendida, halo ofendida sente tauk hodi halai tiha ba ofendida nia tian nia uma.
Konsekuensia husi arguida nia hahalok nee, halo lezada sente moras iha fatin neebe atinjidu.
Tanba nee maka Ministeriu Publiku akuza arguida komete krime Violensia Domestika ho Forma Ofensa Integridade Fisika Simples neebe previstu iha artigu 145 husi Kodigu Penal.
Audensia julgamentu nee prezide husi Juiz Ivan Patrocenio, Ministeriu Publiku reprezenta husi Prokurador Ricardo Leite, arguida hetan asistensia legal husi Advogadu Privadu estajiadu.
Jornalista: Terezinha De Deus
Editora : Domingas Gomes
