DILI, STLTIMORLESTE.com – Iha fulan Abril too Agostu nia laran, bebe neebe mate iha inan nia kabun laran hamutuk 84, tanba komplikasaun.
Tuir Xefe Interina Maternidade HNGV, Maria Franco da Silva hateten, bebe sira neebe mak mate iha inan nia kabun laran nee, tanba iha tempu inan isin rua la halo tratamentu didiak no mai fasilidade saúde tarde mak halo infeksaun, hodi halo bebe mate iha inan nia kabun laran. Nunee iha Abril too Agostu bebe nain 84 mak mate iha inan nia kabun laran.
“Abril too Agostu bebe neebe mate iha inan nia kabun laran hamutuk 84, tanba komplikasaun no kazu nee barak transferensia husi munisipiu sira inklui iha Dili,” hatete Maria Franco da Silva ba jornalista sira iha HNGV, Kuarta (1/10/2025).
Nia dehan, husi Abril too Agostu total inan neebe mak baixa iha sala maternidade HNGV hamutuk 2.906, husi nee bebe neebe mak moris hamutuk 3.035. Husi numeru moris hamutuk nee partus normál 817, partus sesariana 857, vakun ka uza ekipamentu mak dada sai 200, no bebe neebe mak moris ho kidun mak uluk hamutuk 77.
Nia haktuir, inan sira neebe mak partus iha nee enjeral kondisaun diak hotu. Iha nee dalabarak kazu komplikadu nomos inan sira ho tensaun balun ho ran fakar sira nee mak halo opera.
Tuir nia, dala barak kazu sira ho moris permatur nee dahuluk mak inan sira neebe mak ho konhesimentu menus kona-ba saude, daruak mak antes nee sira iha infeksaun hanesan raan mutin ka infeksaun mii, neebe mak mak la halo tratamentu iha fasilidade saude atu kontrola. Ida nee mak kontribui partus sedu, tanba nee mak dala barak pesoal saude sira fo promosaun edukasaun saude ba sira katak, hahu isin rua dahuluk tenke tuir Anti Natal Care (ANC), atu nunee bebe moris ho diak.
Iha fatin hanesan, inan Veronica da Silva informa, nia bebe mate iha kabun laran tanba mai tarde konsulta iha fasilidade saude.
“Hau nia bebe mate iha kabun laran, tanba hau mai iha fasilidade saude tarde, no bee manas fakar ona mos hau la mai. Hau hein too loron rua moras para tiha mak hau foin mai,” dehan nia.
Nia hatutan, too mai Pesoal Saude sira koko labarik nia fuan la book aan ona. Neemak sira operasai deit, tanba bebe mate ona iha kabun laran.
Jornalista: Jeniche da Costa
Editora: Domingas Gomes
