BAUKAU, STLTIMORLESTE.com – Bispu Diozese Baukau Dom Leandro Maria Alves fo ordenasaun ba Diakonu Juvinal Gusmão iha ambitu selebrasaun festa Santa Terezinha do Menino Jesus Kristu iha igreja Parokia Santa Terezinha Kelikai, Munisipiu Baukau.
Liu husi omilia Bispu Diozese Baukau, Dom Leandro Maria Alves hateten, Santa Terezinha moris iha Alensom França neebe durante moris oferese aan tomak ba Misericórdia nian ho hahalok simplisidade neebe sempre reza ba Amu Lulik sira.
No iha loron 01 Outubru nee sarani no amu lulik sira hamutuk iha Igreja Santa Terezinha Kelikai asiste ordenasaun Diakonu Juvinal Gusmão nian neebe konsidera ordenasaun refere hatudu Maromak nia domin iha nia POVU nia leet liu husi sakramentu ordem hatudu Maromak nia fuan no laran luak ba povu no sarani.
“Profeta Jeremias dehan, hau sei haraik ba imi bibi atan tuir hau nia fuan, nee duni ita hateke ba Juvinal nee bibi atan Maromak nian, nee duni nia Maromak nia fuan,” hateten Dom Leandro iha Kelikai, Kuarta (01/10/2025).
Bispo Diozese Baukau nee sublina, Diakonu Juvinal Gusmão simu sai Saserdotal tuir Maromak nia hakarak utiliza sai instrumentu hodi revela Maromak nia aan no lori Maromak nia lian ba Povu.
Dom Leandro haktuir, ba hirak neebe tuir Maromak sei iha Mundu foun no sei tur iha tronu gloria nian.
“Nee duni sei tuur iha neeba, ida nee komfiansa no esperansa fo mai ita sira nee atu metin liu tan iha Nai Maromak,” dehan Bispu Diozese Baukau nee.
Dom Leandro katak, sakramentu ordem hatudu ba ema hotu kona-ba Maromak tau konfiansa ba ema hotu no liu husi sakramentu refere konvida ema hotu atu hola parte iha Maromak nia planu salvasaun, nunee ema neebe Maromak hili signifika Maromak konfia iha nia atu transforma hasantu nia hodi sai insfrumentu Maromak nian.
“Ida nee mak agora daudaun ita haree iha Diakonu Juvinal husik buat hotu-hotu hakarak tuir Maromak, Juvinal iha nia istoria maibe Maromak laran monu ba nia Maromak hakarak halo istoria ida hamutuk ho nia,” Dom Leandro komenta.
Nia akresenta, hili tuir dalan Maromak nian laos buka poder no kadeira, maibe atu servi Maromak liu husi servi sarani sira iha moris loro-loron iha eukaristia, tanba eukaristia mak servisu prinsipal ba Amu Lulik ida.
Entretantu partisipa iha seremonia ordenasaun ba Diakonu Juvinal Gusmão hetan partisipasaun husi Autoridade Sivil no Militares inklui sarani sira iha Parokia Santa Terezinha Kelikai.
Jornalista: Tomas Reis
Editora: Domingas Gomes
