DILI, STLTIMORLESTE.com – Komando Polisia Nasional Timor Leste (PNTL) hamutuk ho FALINTIL – Forsa Defeza Timor Leste (F-FDTL) halao enkontu hodi estabelese ekipa ida kona-ba Operasaun Forsa Tarefa Konjunta (FTC) neebe sei halao iha territoriu nasional durante fulan tolu nia laran.
Portavos PNTL, Superintendente Polisia João Belo esplika katak, enkontru nee hodi forma ekipa ida ba operasaun konjuntu refere.
“Ita enkontru hamutuk nee kona-ba operasaun konjuntu hodi komesa halo daudaun servisu, bazeia ba rezolusaun governu nian. Nunee ekipa servisu komesa estabelese daudaun hodi elabora ami nia servisu, depois sei halo aprezentasaun ba komando rua para orienta ami halo servisu di’ak liu tan,” Porta Voz Polisia Nasionál Timor Leste (PNTL), Superintendente Xefe Polisia João Belo dos Reis ba jornalista sira, hafoin remata enkontru iha komando PNTL, Kaikoli, kuarta (01/10/2025).
Nia hateten, ohin enkontru hamutuk nee hanesan faze preparasaun ba estabelesimentu ekipa refere. Tanba tuir rezolusaun governu operasaun konjuntu sei halao iha fulan tolu nia laran.
Nunee, nia dehan, saida mak komando rua halo nee relasaun ba buat hotu ne’ebe operasaun konjuntu nee atu halo iha tempu badak nia laran.
Iha fatin hanesan, Komandante F-FDTL Komponente Aerea Lizeira, Koronel Helder da Costa hatutan, iha atividade neebe mensiona iha rezolusaun nee mak espesial ba adezaun Timor Leste ba ASEAN.
Nomos atividade sira seluk neebe hanesan komemorasaun loron Proklamasaun Independensia 28 Novembru 1975 nian nomos inklui loron Matebian no selebrasaun festeza Natal no Ano Novu tinan foun no tuan nian.
“Ida neebe mak operasaun forsa tarefa konjuntu ne’ebe mak ita halo, nune’e ho loron boot sira hanesan para lori estabilidade hakmatek ba iha povu no nasaun. Tanba nee atu asegura seguransa mak estabelese ekipa FTC nee”, nia esplika.
Nia informa, operasaun Forsas Tarefas Konjuntu nee hahu funsiona daudaun durante fulan tolu nia laran too iha tinan 2026.
“Ita hahu ona dezde iha loron 14 Setembru fulan kotuk, ho nia durasaun fulan tolu too iha Janeiru 2026 nian. Atividade nee estabelese iha munisipiu tomak nee para ema hotu-hotu bele hakmatek iha estabilidade paz nia laran,” nia konklui.
Molok nee, Governu liu-husi reuniaun Konselhu Ministrus (KM) aprova ona projetu Rezolusaun Governu nian, kona-ba kompromisu operasionál konjuntu entre FALINTIL – Forsa Defeza Timor Leste (F-FDTL) ho Polísia Nasionál Timor Leste (PNTL), ho objetivu atu mantein orden públika durante vizita sira mai Timor Leste husi figura oin-oin no membrus Governu husi nasaun amigu sira.
Tuir komunikadu neebe asesu iha Sesta (12/09/2025) nee haktuir katak, projetu rezolusaun governu nian nee aprezenta husi Ministru Defeza, Donaciano do Rosário Gomes.
Kona-ba kompromisu operasional konjuntu entre FALINTIL-Forsa Defeza Timor Leste no Polísia Nasionál Timor Leste.
“Projetu rezolusaun nee ho objetivu atu mantein orden públika durante vizita sira mai Timor Leste husi figura oin-oin no membrus Governu husi nasaun amigu sira no mos iha ámbitu husi eventu nasionál sira ho importánsia boot, hanesan Timor Leste nia adezaun ba ASEAN, serimónia ofisiál ba komemorasaun tinan 50 Proklamasaun Independénsia no festividade Natál no Tinan Foun nian”, esplika komunikadu.
Tuir komunikadu nee, rezolusaun Governu nee estabelese operasaun patrullamentu no vijilansia iha fatin sensivel iha munisípiu hotu, hodi prevene aktu distúrbiu sosiál.
Nunee, forsa tarefa nee sei koordena husi Xefe Estadu-Maiór-Jenerál Forsas Armadas no Komandante-Jerál PNTL, ho apoiu husi entidade governamentál no institusionál oioin.
Entretantu, rezolusaun nee mos prevee medida espesífiku sira, hanesan define kadeia komandu, regra empeñamentu no apoiu intelijénsia nian, no mós uzu proporsionál husi forsa tuir lei neebe vigora.
Enkuantu forsa tarefa sei halao nia operasaun hahu iha loron 14 fulan-setembru tinan 2025 too loron 6 Janeiru 2026.
Jornalista: Jeniche da Costa
Editor: Xisto Mendonça
