DILI, STLTIMORLESTE.com – Sarani Sentru Pastoral Santa Terezinha do Menino Jesus Kakaulidu realiza misa abertura ba fulan Rosario nian, nomos misa ba Mahein nia loron neebe monu iha loron 1 fulan Outubru.
Bainhira remata selebrasaun Misa Amu Selebrante, Padre Manuel de Aroujo Nunes da Silva ba STL, iha Kakaulidu, Dili, Tersa (01/10/2025) hatete, ohin sarani sira husi sentru Pastoral halibur hamutuk hodi selebra misa abertura ba fulan Rosario nian, nomos selebra mos loron Mahein Santa Terezinha do Menino Jesus neebe monu iha loron 1 fulan outubru.
“Selebrasaun misa ida ohin nee premeiru atu abertura ba fulan rosariu nia, segundu ba mahein sentru Pastoral Kakaulidun neebe mak nia mahein mak Santa Terezinha do Menino Jesus neebe ohin nia 1 nee selebra ida nee mak objetivu prinsipal ba selebrasaun ida nee,” dehan Padre Selebrante nee.
Padre Selebrante nee hatete, fulan Rosariu nee fulan espesial ba sarani Katolika sira nuudar fiar Nain neebe fiar ba nain feto, no fulan Rosariu lori ema ba besik nain feto hodi hamoris vida esperitual liu liu orasaun nia atu nunee bele besik ba Maromak.
“Hanesan nain feto neebe akompanha Jesus too mate iha kruz, ita mos iha responsablidade atu bele fulan ida nee fo ita nia tempu oituan reza tersu iha ita nia uma no iha ita nia komunidade , no fo oportunidade ita hakat ba malu vizita malu iha orasaun nia, Hau fiar katak sarani sira iha fulan ida nee aproveita tempu atu hametin sira nia fiar relasaun ho Maromak atu nunee sira nia moris hanesan sarani Katolika atu bele Tuir nain Feto nia mata dalan,” dehan Padre nee.
Padre nee afirma, aleinde Igreza selebra Santa Terezinha du Menino Jesus ba kreda I ba Sentru Pastoral Kakaulidu, tanba sarani sira nia mahein duni. Tema ba omilia loron Santa Terezinha do Menino Jesus mak fuan Simples klamar hakmatek iha Maromak, leitura nee konvida sarani sira atu fila fali ba fuan ida neebe simples no haraik aan. No profeita Isaias deskreve Jerusalem nuudar komfrontu nia, konfrontu nee katak hakmatek seguru ba ema nia fuan.
Fatin ida neebe Maromak hakalma nia povu hanesan inan ida neebe kaer no hakoak nia oan sira, tanba inan nia kabaas no sadere fatin husik ba oan sira, nemak domin lo-loos ba oan sira.
Nunee mos nia klamar mos bainhira hakmatek ho Maromak mak sei hetan forsa lolos, Tanba nee bainhira ema ida hasae orasaun ho silensiu mak nia kbiit deskobre didiak ho Maromak ho nia problema sira neebe nia hasoru.
Seleberasaun misa ba abertura fulan Rosariu nomos mahein Santa Terezinha du Menino Jesus partisipa husi Xefe Sentru Pastoral Santa Terezinha du Menino Jesus, ho estrutura, autoridade lokal no sarani sira.
Bainhira remata misa Sarani sira hamutuk ho Xefe Sentru ho nia estrutura kontinua lori nain feto tama sai grupu ida idak, neebe mak ezeiste iha sentru nee tuir orariu neebe sira fahe ona kada grupu.
Jornalista: Emerenciana Pinto
Editora: Carme Ximenes
