DILI, STLTIMORLESTE.com – Ministra Edukasaun (ME), Dulce de Jesus Soares hamutuk ho profesores, inan aman no komunidade hodi inaugura Edukasaun Pre Eskolar Moris foun I, neebe lokaliza iha suku Bairo Pite, Aldeia Rai Nain.
Dulce dehan, ohin hamutuk ho estudantes, profesores, inan aman nomos komunidade iha Suku Bairo Pite, iha aldeia ida nee hodi inaugura edifisiu Edukasaun Pre Eskolar, neebe mak projetu ida nee husi kapital dezenvolvimentu iha tinan 2024 ninia no sira finaliza iha 2025. Iha nee iha sala rua, haris fatin ba labarik feto no mane, kuzina ida nomos iha fatin halimar.
“Iha tempu badak ita sei husu play gram iha nee. Neste momentu iha 130 estudantes, maibe ho prezensa iha edifisiu foun ida nee professor sira, liu-liu Kordenadora sei jere, atu nunee bele iha numeru estudantes neebe maka aas liu iha tinan oin. Montante orsamentu ba obra nee US$ 91,500,” dehan nia ba jornalista iha EBC Fatumeta, Kinta (02/10/2025).
Governante nee hatete, professor no professora neebe mak hanorin iha pre eskolar ida nee, materia importante neebe mak sira hanorin disiplina literasia no numerasia, hodi oinsa bele hamutuk ho labarik sira atu halo jogus sira nee, halo labarik sira bele halimar.
Nia hatutan, filosofia iha pre eskolar nee hanorin ho halimar no aprende husi halimar, atu nunee sira bele deskobre rasik sira nia talentu nee plemenus atu ba neebe, tanba pre eskolar nee eskola neebe mak baze tebe-tebes, atu bele prepara estudantes sira, ho nunee sira bele hahu ho sira nian ensinu baziku primeiru no segundu ano ho diak liu tan.
Nunee mos nain ba Kompanhia Providensia Uni.Pesoal Lda, Ilidio Magno hatete, obra ida nee manan liu husi tender Kompanhia Providensia too iha fulan Dezembru la konsege finaliza tanba difikuldade. Entaun konvida fali Kompanhia Providensia Leste hanesan sai fali sub kontratu ba projetu ida nee.
“Ami ezekuta konstrusaun ida nee remata iha loron 30 Setembru tinan nee, ohin ita konvida Ministra mai inaugura,” tenik nia.
Jornalista: Jacinta Sequeira
Editora: Domingas Gomes
