DILI, STLTIMORLESTE.com – Pre Eskolar Moris Foun I husu Ministériu Edukasaun (ME) atu aumenta profesores ba sira nian eskola, tanba daudaun nee sei menus.
Tuir Kordenadora Pre Eskolar Moris Foun I, Domingas Beatriz da Cunha dehan, agora daudaun iha deit profesores nain 4, tanba nee sujere ba ME atu aumenta profesor mai iha eskola nee.
“Agora daudaun ami iha profesores nain 4, tanba nee ami iha sujestaun ida ba ministra, karik tinan oin mak ami nian estudantes aumenta tan iha pre eskolar ida nee, ami husu tan atu aumenta profesores nain 1. Agora daudaun nee ami nian profesores nain 4 deit. Hau mos husu ba ME katak, too ohin loron ami seidauk iha bee moos,” dehan nia ba jornalista sira, Kinta (02/10/2025).
Nia dehan, pre eskolar nee seidauk iha bee moos, oinsa parte husi ME atu haree ba asuntu ida nee. Nunee mos husu atu apoiu profesores nain 1 ba iha sira nian eskola, tanba sira iha profesores nain 4 deit.
Iha fatin hanesan, Ministra Edukasaun (ME), Dulce de Jesus Soares hatete, iha IX Governu Konstitusional, iha prosesu atu koloka profesores nee tenke halo quadro pesoal, tanba husi quadro pesoal mak desidi katak, eskola ida nee presiza profesores nain hira tan no iha disiplina saida.
Dulce dehan, neebe tenke update fila fali quadro pesoal neebe mak iha ona, atu nunee bele fo informasaun los katak, presiza tan profesores tuir nesesidade.
Jornalista: Jacinta Sequeira
Editora: Domingas Gomes
