DILI, STLTIMORLESTE.com – Kazu naok no futu loja nain iha Likisa, Tribunal Judisial Primeira Instansia Dili halo alterasaun kualifikasaun juridiku no aumenta tan krimi Roubo.
Iha sala julgamentu laran Juiz prosesu Zulmia Auxiladora deklara katak, Ministeriu Publiku akuza arguidu sira ho krimi Arma Branka no Burla Agravadu.
Maibe Tribunal haree katak, ida neebe akontese ba iha loja Likisa nian, arguidu sira futu loja nain, tanba nee Tribunal halo alterasaun kualifikasaun juridiku hodi aumenta tan krimi Roubo.
Ho nunee Tribunal mos adia hikas julgamentu nee ba iha loron 10 fulan nee, hodi rona alegasaun foun husi parte defeza no mos parte Ministeriu Publiku nian, depois mak sei submete ba iha faze leitura akordaun nian.
Antes nee iha alegasaun, Ministeriu Publiku solisita ba iha Tribunal Koletivu atu kondena arguidu nain tolu ET, MMO, AM ho pena prizaun tinan 10.
Iha alegasaun nee, Prokurador Domingos Barreto deklara katak, arguidu nain tolu konfesa ba faktus neebe konsta iha akuzasaun.
Prokurador ba prosesu deklara, arguidu nain tolu prienxe hotu ba krimi neebe iha, no aktu neebe arguidu sira halo tama iha loja rua.
Nunee Prokurador mantein ho akuzasaun neebe iha konsidera katak, faktus neebe konsta iha akuzasaun provadu bazeia ba deklarasaun husi arguidu, no reforsa tan husi sasin sira neebe arola.
Tanba nee Ministeriu Publiku solisita ba iha Tribunal Koletivu atu kondena arguidu nain tolu, no kada arguidu ida hetan prizaun tinan 10.
Enkuantu husi parte defeza, Advogadu Privadu Manuel Tilman solisita ba iha Tribunal atu tetu sirkunstansia hotu, hodi bele aplika justisa neebe justu ba iha arguidu nain tolu.
Jornalista: Terezinha De Deus
Editor: Xisto Mendonça
