DILI, STLTIMORLESTE.com – Parlamentu Nasional (PN) husu Komando Polisia Nasional Timor Leste (PNTL) atu demite oknum polisia neebe fo arma ba sidadaun Xineza ida hodi treinu tiru iha Kaitehu, Aldeia Mota ikun, Suku mota Ulun, Postu Administrativu Bazartete, Munisipiu Likisa.
Tuir Membru Komisaun B neebe trata asuntu Negosiu Estranjeiru Seguransa no Defeza, Deputadu Natalino dos Santos katak, Komando PNTL tenke demite oknum polisia nee tanba fo fali kilat ba ema sivil, satan ema estranjeiru hodi halo treinamentu tiru nee viola lei no regas neebe iha.
Tuir nia, oknum polísia husi Korpu Seguransa Pesoal nee viola lei, tanba tuir lei neebe iha so membru polisia ho Forsa Defeza Timor Leste mak bele kaer kilat no pistola hodi halo treinamentu tiru.
“Ida nee grave tebes-tebes, nuudar membru Komisaun B apela ba Komando Jeral PNTL atu toma medidas ida neebe forte no tenke halo investigasaun, motivu saida mak nia fo kilat ba ema Xineza hodi treinu, no tenke hetan duni sansaun no bila perlu demite nian,” hatete nia ba jornalista sira, iha resintu PN, Dili, Sesta (02/10/2025).
Nia hatutan, Komando PNTL tenke foti medida indisiplinar ba nia nunee nia bele responsabiliza ninia aktu neebe nia halo nee la diak, tanba estraga ona imajen Corpo Seguransa Pessoal neebe fo protesaun ba alta entidade sira estadu nian
“Hau hakarak husu Polisia Nasional Timor Leste liu-liu Komando Jeral PNTL atu halo investigasaun, hodi hatene objetivu saida mak nia lori kilat no pistola ba fo treinamentu ba ema estranjeiru, la podia ida nee akontese, ida nee grave tebes-tebes,” dehan Deputadu nee.
Molok nee Portavos PNTL Interinu, Superiendente Polisia, Moizinho Coreia nee rekonhese katak, deskonfia duni membru CSP balu fo kilat ba sidadaun estranjeiru hodi tuir treinu tiru.
“Hau hanoin los duni katak, viral iha media sosial iha video ida neebe ke deskonfia katak, iha involvimentu membru seguransa pesoal ida husi PNTL neebe fo arma ba sidadaun estranjeiru balu hodi tiru,” hatete Superiendente Polisia, Moizinho.
Nia dehan, Komando PNTL toma ona atensaun hodi fo medida loke prosesu investigasaun ba membru CSP balu neebe seidauk indentifika lo-loos ninia inisial sira.
“Maibe kona-ba ida nee prosesu lao hela, sese mak involve ita sei haree, pelumenus semana oin hanesan nee bele update ba ita boot sira,” nia esplika.
Jornalista: Alberto Menezes
Editora: Carme Ximenes
