DILI, STLTIMORLESTE.com – Ministériu Defeza (MD) ho Ministeriu Interior (MI) halo enkontru koordenasaun no avaliasaun seguransa konjunta nian, entre FALINTIL-Forsa Defeza Timor Leste (F-FDTL) ho Polisia Nasionál Timor Leste (PNTL).
Ministru Interior (MI), Francisco da Costa Guterres dehan, enkontru koordenasaun no avalisaun entre F-FDTL ho PNTL iha okaziaun serimónia ofisial komemorasaun adezaun bá ASEAN ho serimonia ofisial tinan 50 ba Proklamasaun Independénsia Repúblika Demokrátika TL no selebrasaun natál no tinan foun.
“Ita tenta oinsa atu artikula F-FDTL ho PNTL atu difini forsa tarefa ida para atu servisu hamutuk, hodi nunee bele asegura ita nia paz no estabilidade iha ita nia rain, ita sei iha 28 Novembru no 12 Novembru, no ita iha mos natal no anu novu,” hatete Ministru Francisco da Costa Guterres ba jornalista iha salaun Auditoriu Kuartél Jenerál F-FDTL Fatuhada, Sesta (03/10/2025).
Nia tenik, MI ho MD realiza enkontru nee hodi koordena servisu oinsa instituisaun F-FDTL ho PNTL nee servisu ho diak, hodi bela asegura eventu sira nee hodi lao ho diak.
“Ita nia forsa defeza seguransa nee ita preparadu hela, tanba nee mak ita artikula no mai para atu defini diak liu tan tarefa sira nian, artikula hamutuk para depois atu enfrenta problema no kualker probelma neebe mai tenke kria paz no estabilidade iha ita nia rain,” nia informa.
Governate nee hanoin F-FDTL ho PNTL preparadu hela, tanba nee iha enkotru iha Xefe Estadu Maior Jenerál F-FDTL, Tenente Jenerál, Domingos Raul “Falur Rate Laek” ho Komandante Jerál PNTL, Komisariu Polísia Henrique da Costa esplika ona konaba preprasaun neebe maka iha, para forsa rua nee servisu hamutuk hodi asegura paz no estabilidade iha pais ida nee.
Entretantu iha enkontru nee lidera husi Ministru Defeza (MD), Kontra Almirante Donanciano Costa Gomes “Pedro Klamar Fuik” ho Ministru Interior Francisco da Costa Guterres, akompanha husi Xefe Estadu Maior Jenerál F-FDTL, Tenente-Jenerál, Domingos Raul “Falur Rate Laek” no Visi Xefe Estadu Maior Jenerál F-FDTL Major Jenerál Calisto Santos “Coliati”Komandante Jerál PNTL, Komisariu Polísia Henrique da Costa, Segundu Komandante Jerál PNTL, Komisariu Polísia Pedro Belo, Xefe Estadu Maior F-FDTL Brigadeiro Jenerál José da Costa Soares ‘TRIX’, IDN, Komandante Komponente no Unidades F-FDTL, Komandante Munisípiu PNTL tomak nomos ofisiais superiores husi F-FDTL ho PNTL sira.
Jornalista: Jeniche da Costa
Editora: Domingas Gomes
