DILI, STLTIMORLESTE.com – Ministeriu Finansas (MF) esklarese ba publiku katak, Governu laiha intensaun atu mantein halo pagamentu, tanba lei pensaun vitalisia revoga tiha ona.
Kestaun nee hatoo husi Diretor Jeral Unidade Komunikasaun no Relasaun Publika Ministeriu Finansas, Fernando M. Ribeiro ba jornalista iha edifisiu Ministeriu Finansas, Aitarak Laran, Sabadu (04/10/2025).
Nia hatete, Governu laiha intensaun atu mantein ka halo nafatin. Nee mak Ministeriu Finansas hakarak esklarese asuntu foin lalais nee kona-ba revogasaun ba pensaun vitalisia no benefisiu sira seluk husi Eis Titulares no eis membru orgaun soberania sira.
“Iha loron 29 Setembru 2025, Prezidente Republika promulga revogasaun formal ba lei pensaun mensal deputadu sira nian no lei neebe aprova Estatutu Titular orgaun Soberanu sira nian. Ho revogasaun nee, laiha ona baze legál atu halo pagamentu tuir diploma revogadu sira nee,” dehan nia.
Ministeriu Finansas garante ba populasaun katak, osan sira nee sei la uza ba objetivu sira neebe prevee ona antes. Hanesan determina husi lejislasaun neebe vigora, Governu so bele gasta rekursu publiku bainhira iha baze legal neebe fo dalan. Iha kazu ida nee baze legal neeba la eziste ona hafoin revogasaun husi lei respetiva sira.
Revogasaun nee foin aprova hafoin Governu finaliza tiha ona projetu Orsamentu Jeral Estadu tinan 2026. Tamba nee maka projetu OJE sei inklui nafatin hela lina ida neebe dedika ba programa pensaun vitalisia. Maibe, tanba lei revoga tiha ona, agora nee kabe ba Parlamentu atu analiza no deside iha debate orsamentu atu oinsa realoka filafali fundu ida nee.
“Ministeriu Finansa sublina katak, Governu laiha intensaun atu manteinn ka halo nafatin pagamen tamba lei revoga tiha ona. Rumoris kona-ba utilizasaun verba ida nee hodi uza nafatin ba objeti pagamentu pensaun vitalisia nee la loos,” katak nia.
Nia hatutan, Governu iha nafatin kompromisu atu jere finansas publikas ho responsabilidade, transparante no sempre tuir lei.
Jornalista: Emerenciana Pinto
Editora: Domingas Gomes
