DILI, STLTIMORLESTE.com – Relasiona ho ema deskonhesidu sunu Eskola Cafe rua neebe akontese iha semana rua ba kotuk, too agora parte Polisia Nasional Timor Leste (PNTL) Munisipiu Likisa seidauk fo rezultadu ba Servisu Edukasaun Munisipiu (SEM) Likisa.
Haktuir Diretor Servisu Edukasaun Munisipiu Likisa, Julio da Silva ba jornalista STL liu husi telefone, Sabadu (04/10/2025).
“Liga ho akontesimentu ema deskonhesidu sunu Eskola Cafe rua neebe akontese iha semana rua ba kotuk, ita hatoo ona informasaun ida nee ba parte PNTL eskuadra Likisa ninia, maibe too ohin ninia rezultadu sira seidauk fo hatene mai ami, maibe Segunda nunee hau sei ba konfirma fali asuntu ida nee ba iha Komando PNTL Munisípiu Likisa ninia, akontesimentu sunu Eskola Cafe rua nee akontese tui-tuir malu, PNTL seidauk fo rezultadu mai ami,” nia esplika.
Diretor SEM Likisa nee hatutan, Segunda loraik nunee nia rasik sei ba konfirma fali iha Komando PNTL Likisa ninia, maibe momentu nee sira nian karta hatama iha eskuadra PNTL no superintende hatoo ona ba parte investigasaun munisípiu ninia, maibe seidauk fo fali informasaun ba sira.
“Eskuadra PNTL nee besik malu ho ita nian Eskola Cafe rua nee, nee duni Segunda nee hau tenke ba husu fali iha komando, parte atu koalia kona-ba ezame nasional ninia, inklui koalia kona-ba asuntu sunu eskola rua nee,” nia dehan.
Jornalista: Jacinta Sequeira
Editor: Xisto Mendonça
