BAUKAU, STLTIMORLESTE.com – Komando Polisia Nasional Timor Leste (PNTL) sei fo ezame kultural ba kandidatura membru polisia foun hamutuk nain 771, iha Munisipiu Baukau.
Relasiona rekrutamentu ba membru Polisia foun neebe Governu liu husi Ministeriu Interior, anunsiu ba publiku hodi jovem sira iha territoriu tomak submete dokumentus neebe husi Baukau simu kandidatu hamutuk rihun 12 no selesaun lao kandidatu hamutuk nain 778 mak liu enkuantu nain 7 eleminadu, tanba submete formulariu la tuir orientasaun hanesan submete fali formulariu foto kopia no kontinuasaun ba faze exame kultural kandidatu 771 mak sei partisipa neebe exame refere sei realiza iha eskola Sekundaria Jeral 02, Vila Nova ,Baukau.
Komadante Komando Polisia Munisipiu Baukau, Superintendente João Sancho Pires informa, ezame nee rasik sei realiza iha loron 12 Outumbro tinan nee, tanba nee Komando Polisia Nasional Timor-Leste foti inisiativa kapasita formasaun ba fiskalizador nain 40 molok hakat ba exame refere.
“Ohin halo hela formasaun ba fiskalizador nain 40 neebe mak iha hela Komando PNTL Baukau atu bele haree ita nia oan no alin sira neebe mak prova kultural iha dia 12 ekipa sira husi delegadu segundu Komadante hamutuk ho Xefe Administrasaun fo hela treinamentu ba kolega sira atu nunee atividade ida nee halao iha dia 12,” hateten João Sancho Pires, iha Vila Nova, Baukau, Segunda (06/10/2025).
Nia sublina, husi numeru kandidatu ba membru Polisia foun nain 771 kompostu husi veteranu nia oan, polisia nia oan no komunidade jeral neebe kouta fahe ona husi Governu, tanba nee husu kandidatura sira prepara aan hodi partisipa iha exame refere.
“Esperansa ita nian fo hatene alin no oan sira neebe mak tuir hela, tanba rezolusaun Governu nian sai ona, materia neebe mak estuda estuda hela ba hodi nunee tuir exame iha dia 12,” Komadante Komando Polisia Baukau informa
Entertantu formasaun ba ekipa fiskalizador hamutuk nain 40 durante loron ida realiza iha edifisiu Komando Polisia Munisipiu Baukau.
Jornalista: Tomas Reis
Editora: Carme Ximenes
