DILI, STLTIMORLESTE.com – Komisaun Funsaun Publika (KFP) halao formasaun ba kargu Xefia nomos ajente funsionariu publika neebe haknaar aan iha Institutu Nasional Combate HIV-SIDA (INCIDA I.P) ho tema “Deziminasaun Lejislasaun Funsaun Publika ba Funsionariu Refere”.
Prezidente INCSIDA,I.P, Daniel Marcal dehan, formasaun nee halao husi KFP ba ajente sira, tanba sira nee tama hotu ba ajente KFP. Neebe sira iha direitu no iha dever atu konese didiak sira nia servisu no kargu neebe sira iha, tanba tenke iha formasaun ruma.
Nia tenik, durante nee funsionariu INCSIDA seidauk hetan formasaun, nee foin maka permeira ves. Ida nee mos liu husi prosesu ida, tanba prosesu tuir dekrutamentu hotu-hotu tuir regras KFP nian no agora sira sai ona ajente KFP nian, neebe sira iha dever nomos iha direitu atu komprende regras funsaun publika nee oinsa.
“Husi formasaun mak ita bele hatene nia lao oinsa, sei lae hotu-hotu servisu tuir nia hakarak no ezije buat barak demais maibe servisu la hatene. Neebe ho formasaun loron lima nee espera bele fasilita sira hodi hasae sira nia konesementu, liu-liu ba kargu Xefia sira oinsa lori INCSIDA nee lao diak liu tan,” hatete Daniel Marcal ba jornalista iha Pantai Kelapa, Segunda (06/10/2025).
Nia esplika, funsionariu sira iha INCSIDA servisu kleur ona, no kargu Xefia no Diretór sira nee troka posizaun deit, maibe sira servisu hanesan Diretur no Xefe Departamentu nee laos funsionariu foun.
Nia hatutan, kargu Xefia no Diretór sira nee funsionariu antigu hotu, foin dadaun iha tinan hira ba kotuk nee maka prosesu KFP promosaun, tanba nee sira balun sai Diretór, balun sai Xefe Departamentu, sai Xefe Seksaun, neebe ema foun laiha. Foun nee nain hira deit, no 14 nee ba kazuais sira deit.
Iha fatin hanesan Komisariu Funsaun Publiku ba asuntu Planeamentu Forsa de Trabailhu, Jose Telo Soares Critovao katak, INCSIDA I.P halao kordenasaun ho KFP hodi realiza formasaun ba kargu Xefia nomos ajente funsionariu publika durante loron lima. Loron lima nee importante tebes ba funsionariu sira hodi tuir formasaun nee, hodi aumenta sira nia konesementu hodi halao knar iha INCSIDA nee ho diak.
“Ita hotu hatene funsionariu publiku hotu-hotu iha direitu 40 dias kada tinan,” nia hatutan.
Nia deklara, programa ida nee halo husi INCSIDA, husu apoiu KFP hodi hatoo materia neebe papel fundamentu husi funsionariu idak-idak, para sira bele hatene sira nia papel, diretu no dever atu nunee implementa servisu INCSIDA nian ho diak.
Nunee mos Xefe Departamento Rekursu Humano iha INCSIDA, Natalino Leto informa, teme konaba deziminasaun lejislasaun funsaun publika ba funsionariu INCSIDA,IP nee ninia objetivu hasae kapasidade ho konesementu ba funsionariu INCSIDA nian, oinsa para funsionariu bele hatene ninia servisu no hatene ninia dever no diretu.
Jornalista: Jeniche da Costa
Editora: Domingas Gomes
