DILI, STLTIMORLESTE.com – Relasiona ho Governante sira neebe lei fo dalan atu ba deklara rikusoin iha Tribunal Rekursu (TR), husi parte Tribunal nian sei verifika iha sistema, se mak seidauk deklara rikusoin bele hetan sansaun.
“Tuir lei KAK nian iha rua balu rejistu iha KAK no balu rejistu iha Tribunal Rekursu (TR) liu-liu orgaun soberanu sira, no tuir lei se mak la rejistu krimi dezovidensia, imi nia perguntas nee too agora ita seidauk iha dadus neebe indika se mak seidauk, maibe se karik iha ita sei aplika sansaun ba sira,” dehan Prezidente Tribunal Rekursu, Afonso Carmona ba jornalista sira iha Kaikoli, Segunda (06/10/2025).
PTR dehan, sei halo fali verifikasaun ida, tanba kada fulan Janeiru rejista ona no sei buka informasaun atu aplika sansaun ruma tuir lei haruka ba sira neebe la kumpri.
“Ita sei haree fali iha sistema, tanba membru Governu balu eis ona, sei haree mos iha mudansa numeru Ministru, Vise Ministru no mos Sekretariu Estadu sira. Tanba nee, tuir lei se mak la kumpri sei aplika sansaun administrativa, koa sira nia salariu 25%, maibe kona-ba sansaun penal liga ho dezovidensia no haree liu husi sistema mak foin loos.
Nia afirma, tuir lei antes atu kaer pozisaun nee fulan ida antes rejista ona, no sei haree keta halo erru iha TR no KAK mak balu la mai rejista, keta halo husi parte TR no KAK mak la informa hodi mai rejista, sei haree hotu.
Iha fatin ketak, Akademiku UNTL, Rafael de Jesus dehan, ema hotu iha lei nia okos, tanba nee se mak la halo tuir tenke aplika sansaun.
“Hau hanoin se mak la kumpri regra neebe iha tenke aplika sansaun, liu-liu ba hirak neebe lei fo dalan atu deklara rikusoin, tenke halo tuir ida nee no kumpri hodi ba deklara rikusoin,” dehan nia.
Nia hatutan, hanesan Timor oan neebe asumi responsabilidade boot, tenke hatudu ezemplu neebe diak ba sidadaun sira, hodi hakruk ba regra neebe iha.
Jornalista: Terezinha De Deus
Editor: Xisto Mendonça
