DILI, STLTIMORLESTE.com – Harii Tribunal Supremu Justisa (TSJ) presiza instala uluk komisaun rekrutamentu ba Juiz.
Tuir Ministru Justisa, Sergio Hornai katak, ita iha ona roteiu ida neebe ita koalia, no koalia ona ho Parlamentu Nasional, Prezidente Republika, Governu no Tribunal rasik atu bele hakonu roteiu ida nee.
“Komisaun rekrutamentu no instalasaun ba rekrutamentu Juiz ita komesa estabelese daudaun, Prezidente Republika no Prezidente Tribunal Rekursu ba haree ona fatin iha futuru atu estabelesimentu ba komisaun nian, ka aban bainrua nakfilak ba Tribunal Supremu Justisa, depende ba Prezidente Tribunal Rekursu no mos Konselhu Superior Majistradu Judisial (KSMJ),” dehan Ministru ba jornalista sira iha Kaikoli, Segunda (06/10/2025).
Ministru Justisa esplika, Prokurador Jeral Republika sei iha Prokurador Republika rekursu neebe mak sei kontribui, Defensor Publiku Jeral sei tau mos iha neeba hodi hatan ba problema sira iha Tribunal Rekursu (TR).
Nia dehan, infraestrutura fasil maibe presiza rekursu, se rekursu kompletu ona bele lao ba oin, no importante mos mak komisaun selesaun ba dokumentus tuir lei organizasaun judisiariu iha artigu 83 neebe presiza iha komisaun ida, kuandu ida nee kompleta ona, kona-ba infraestrutura nee fasil.
“Komisaun neebe estabelese sei mai husi Parlamentu Nasional nain 2, Prezidente Republika nain 1 no sei rona mos KSMJ atu halo rekrutamentu ba Juiz, dezembargador nain 7 mak sei halao servisu ida nee.
Iha fatin ketak, Prezidente Repúblika José Ramos Horta hatete, tuir planu edifisiu Tribunal tuan iha Mandarin sei estabelese hanesan Supremu Tribunal Justisa temporariu, tanba nee mak PR ba observa iha fatin neeba.
“Hau rona atu muda ka atu tau Tribunal Supremu iha neeba, mak hau mos koriozidade hakarak mai haree. Prezidente Tribunal Rekursu mos fo nia tempu disponivilidade para mai hatudu fatin, ida nee atu sai sede ba Tribunal Supremu, maibe fatin ida nee sei instala ba Tribunal Supremu hanesan temporariu, tanba dezenhu ba Tribunal foun Supremu iha ona no rai mos iha ona,” dehan Xefe Estadu.
Jornalista: Terezinha De Deus
Editor: Xisto Mendonça
