DILI, STLTIMORLESTE.com – Tribunal movel iha tinan 2026 sei implementa ho naran Tribunal Movel Modifikatif.
“Tribunal movel lao hela, ita ho pensamentu foun dehan Tribunal Movel Modifikatif halo deit julgamentu, maibe laos ba halo deit julgamentu, ita mos ba halo sosializasaun no divulgasaun ba lei, ida nee sei aplika iha tinan 2026,” dehan Prezidente Tribunal Rekursu, Afonso Carmona ba jornalista sira iha Kaikoli, Segunda (06/10/2025).
Nia esplika, Tribunal movel ida baibain nee lao hela, no oras nee daudaun Juiz balu realiza hela julgamentu movel iha munisipiu.
“Agora mudansa ona ba iha sistema, iha tempu uluk husi Konselhu Superior Majistradu Judisial (KSMJ) aprova mak Juiz sira ba halo julgamentu movel,” dehan nia.
Nia informa, uluk Juiz Administrador sira, Prezidente Tribunal Rekursu mak nomeia, maibe tuir lei foun nee KSMJ mak nomeia no poder atu halo planu entrega tiha ba Juiz Administrador sira.
Nia argumenta, saida mak sira halo suporta deit, tanba sira iha poder atu halo no tenke respeita liga ho desizaun Juiz nian, no julgamentu nee atu halao dala hira? kada fulan haree ba iha Juiz Administrador sira nia planu.
Mezmu nunee, julgamentu movel hanesan parte ida atu kontribui hodi redus kazu pendente, no iha prosesu sira neebe lori ba iha julgamentu movel balu bele deside kedan iha neeba.
Iha fatin ketak, Juiza Administradora Tribunal Dili, Edite Palmira dehan, julgamentu movel lao hela no prosesu neebe lori desizaun deside kedan iha neeba.
“Julgamentu movel lao hela no planu iha fulan Outubru haruka hotu ona ba iha TR, no Juiz sira marka antes loron 30 haruka ona ba iha TR hodi aprova, tanba tenke prevee orsamentu,” dehan nia.
Nia esplika, iha julgamentu movel nee sira lori prosesu 30 husi singular no koletivu, no prosesu sira nee halo kedan desizaun iha neeba.
Jornalista: Terezinha De Deus
Editor: Xisto Mendonça
