DILI, STLTIMORLESTE.com – Governu liu husi Sekretaria Estadu ba Igualdade (SEI) nafatin halo advokasia ba redusaun no eliminsaun violensia bazeia ba jeneru, iha Timor Leste.
Kestaun nee hatoo husi Sekretariu Estadu ba Igualdade (SEI), Elvina Sousa Carvalho ba STL, iha nia knaar fatin, Kaikoli, Díli, Tersa (07/10/2025) husu ba sidadaun neebe mak hetan violensia bazeia ba jeneru nomos tipu violensia hotu labele tauk hatoo keisa, no oras nee SEI kontinua halo advokasia ba eliminasaun violensia bazeia ba Jeneri iha TL.
“Hau hanoin Sekretariu Estadu ba Igualdade sei nafatin kontinua halo advokasia ba redusaun no eliminasaun violensia bazeia ba jeneru iha Timor Leste inklui violensia domestika esforsu neebe mak agora lao dadaun mak ida neebe mak ongoing prosesu hela mak revisaun lei kontra violensia domestika neebe mak iha ona prosesu bele dehan too prosesu final ona hein deit hetan pareser husi linas ministerias husi implementador sira hodi bele finaliza no lori ba iha konsellu Ministru,” dehan nia.
Lei kontra violensia domestika tuir nia, iha ona prosesu final hein deit pareser husi linas ministerias implementador sira hodi finaliza iha Konselhu Ministru, ida nee progresu neebe mak SEI halo, no durante nee hetan mos rekomendasaun husi Komisaun F iha parlamentu Nasional GMPTL atu bele halo revizaun.
“Rekomendasaun husi komisaun F iha Parlamentu Nasional GMPTL, atu halo revizaun ba lei nee, agora ita iha ona prosesu final ba revizaun,” hatete governante nee.
Iha biban nee Membru Governu husu ba sidadaun neebe mak sai vitima ba violensia domestika tantu feto no mane, nafatin iha korajen hodi hatoo sai bainhirahasoru kualker tipu de violensia brani koalia sai, tanba iha lei proteze nomos kondena autor sira.
Aleinde nee Sekretaria Estadu ba Igualdade (SEI) kontinua aplika estratejia abordajen integrada Jeneru AIJ atu asegura polítika, lei, no orsamentu hodi promove Igualdade Jeneru no inkluzaun.
Sekretaria Estadu ba Igualdade (SEI) hanesan Instituisaun Estadu ho nia papel atu koordena no monitoriza kompromisu igualdade jeneru no inkluzaun implementa iha nivel hotu-hotu, no SEI nia foku mak, atu instituisaun estadu, governu no privadu nian hotu aplika estratejia Abordajen Integrada Jeneru (AIJ) atu asegura politika, lei, programa, no orsamentu hodi promove igualdade jrneru no inkluzaun, prenene no kombate violensia hasoru feto no labarik-feto hakbiit ekonomia feto portador defisiensia membru komunidade LGBTQI no grupu vulneravel sira seluk, no promove partisipasaun feto iha polítika no pozisaun foti desizaun iha nivel hotu-hotu.
Iha loron Segunda Sekretaria Estadu ba Igualdade hamutuk UNDP iha Timor-Leste asina memorandu intendementu no lansamentu sertifikasaun jeneru, subsidiariu ho United Nation Development Program (UNDP), atu hametin kooperasaun parseria ba implementasaun programa iha prosesu apoiu ba programa hakotu violensia kontra feto no labarik.
Jornalista: Emerenciana Pinto
Editora: Carme Ximenes
