DILI, STLTIMORLESTE.com – Inspetor sira sempre halo monitorizasaun ba atividades hotu neebe mak lao iha eskola Munisípiu Dili.
Superintendente Edukasaun Munisipiu Dili, Cesarina Correia Guterres dehan, monitorizasaun husi inspetor ka inspetora sira lao normal hanesan baibain.
“Hau hakarak atu informa katak atividade monitorizasaun husi ita nian Inspector ka inspetora sira lao normal hanesan bai-bain, tanto atividade merenda eskolar nomos prosesu aprendizajen lao diak. Inspetor ka inspetora sira nia servisu rutina, lor-loron maibe tanba eskola barak sira la permanente iha eskola ida, esplika nia ba STL, Tersa (07/10/2025).
Nia akresenta, normalmente kuandu inspetor ka inspetora sira hetan dezafiu ou hasoru erru, sira koko rezolve no hatoo rezultadu ba nia, maibe kuandu erro ruma inspetor ou inspetora sira sente la bele rezolve mesak entaun sira informa ba nia, para sira kria fali ekipa hodi tun ba eskola atu enkontru ho eskola signifika katak sira halo prevensaun.
Nunee mos Diretor Servisu Edukasaun Munisipiu Manatuto, Patricio da Cruz Quintao hatete, inspetor sira halo inspesaun nee ba atividades prosesu aprendizajen. Prezensa profesor sira, merenda eskolar, konsesaun eskolar, nee duni inspetor sira halo kontrolu ba asuntu hirak neebe ohin mensiona.
“Ita nian inspektor sira nee, ita kompara ho uluk, agora nee sira rutin liu,tanba uluk nee ita bele dehan iha postu balun sira laiha, maibe agora nee ita iha inspektor sanolu, neebe sira idak-idak fahe sira nian area kontrolu, aleinde sira monitorizasaun individual kada postu, maibe sira mos halo monitorizasaun konjunta,” dehan nia.
Nia afirma, agora daudaun Inspetor eskolar iha Munisípiu Manatuto hamutuk nain 10, husi numeru nee nain 2 pre eskolar, ensinu baziku nain 7 no ensinu sekundariu jeral nain 1
Jornalista: Jacinta Sequeira
Editora: Domingas Gomes
