DILI, STLTIMORLESTE.com – Estudantes husi Ensinu Baziku Sentral (EBC – sigla português) Nobel da Paz la konsumu ikan no ayam potong, tanba ikan ho ayam potong la tama iha menu.
Haktuir Xefe Ekipa Fornesedór ba Merenda Eskolar iha EBC Nobel da Paz, Natarcia Baptista ba jornalista STL, Tersa (07/10/2025).
“Ita nian estudantes sira tama eskola meudia, sira han tuku rua loraik. Menu nee mak Segunda ami tein naan karau halo bifi, Tersa ami daan koto tau ho naan ruin no naan isin, ikan ho ayam potong la tama iha menu, tanba nee estudantes sira la han ikan ho ayam potong, manu tolun estudantes sira han iha loron Kuarta, fore mungu ho susu been, nee estudantes sira han iha loron Sesta,” nia dehan.
Nia afirma, dader sira ba tein tuku sia, tanba estudantes ensinu baziku nee tama eskola meudia, dader nee ba sekundariu sira. Nee duni estudantes sira han tuir oras neebe iha, loron ida sira tein dala ida deit.
Nunee mos Jeremias P.de Jesus nuudar Fundador Eskola Nobel da Paz hatete, merenda eskolar iha eskola ida nee lao diak tebes, tanba ema sira tein nee lao tuir menu neebe mak iha ona, ema nain rua mak tein ba estudantes sira han.
“Hau hanoin programa merenda eskolar iha nee lao diak hela, estudantes 370 resin mak asesu ba iha programa merenda eskolar iha eskola ida nee, nee duni ita nian numeru estudantes mos sempre aumenta,” nia informa.
Nia dehan, estudantes sira kada loron asesu programa merenda eskolar, liu-liu estudantes sira husi nivel ensinu baziku sira, dader estudantes sekundariu mak halao aprendizajen no meudia estudantes husi nivel ensinu baziku sira.
Jornalista: Jacinta Sequeira
Editora: Domingas Gomes
