BAUKAU, STLTIMORLESTE.com – Governu liu husi Ministeriu Agrikultura Pekuaria Peskas no Floresta responde ona preokupasaun balada protejidu rusa neebe mak durante nee enfrenta bee iha ilha Jaco.
“Bee agora la problema agora iha ona Balu atu mobiliza no estila tasi been, projetu seidauk entrega maibe ida nee mak atu fornese,” Administrador Postu Tutuala, Carlito Pereira informa liu husi telefone, Tersa (07/10/2025).
Bee neebe atu kanaliza hodi responde ba nesesidade rusa nian iha ilha Jaco tuir nia, Ministeriu Agrikultura Pekuaria Peskas no Floresta indika direita kompanhia lokal ida neebe daudaun halo ona servisu mobiliza ekipamentu, atu transforma tasi been sai bee hodi rusa sira iha ilha Jaco konsumu, tanba durante nee iha tempu bailoron rusa sira halerik ba bee.
Maibe Politika Governu liu husi Ministeriu Agrikultura Pekuaria Peskas no Floresta transforma tasi been sai bee hodi rusa sira konsumu nee diak, tanba bele moris, maibe preokupa ida mak kona-ba hahan.
“Agora ai-tahan mak sei prezisa maibe ida nee jestaun guarda nian neebe jere hela iha neeba, semana ida dala ida ai-tahan prezisa lori husi rai dook ba iha rai sorin Jaco,” Carlito katak.
Autoridade Postu Tutuala nee husu Ministeriu Agrikultura Pekuaria Peskas no Floresta atu re-floresta iha ilha Jaco, atu nunee iha tempu bailoron rusa sira bele iha hahan hodi han, tanba daudaun ekipa Florestal sira lori ai-tahan husi Tutuala hafoin fo han rusa sira iha ilha Jaco.
Jornalista: Tomas Reis
Editora: Carme Ximenes
