BAUKAU, STLTIMORLESTE.com – Asosiasaun Ramelau Oan Moris Domin iha Timor Leste (AROMD-TL) hamutuk ho Sekretariu Estadu ba Formasaun Profesional no Empregu (SEFOPE), lansa formasaun lian Korea no Ingles iha area Uatulete, Aldeia Lutumutu, Suku Tirilolo, Postu Baukau Vila, Munisipiu Baukau.
Diretor Asosiasaun Ramelau Oan Moris Domin iha Timor-Leste Gaspar da Costa Pacheco esplika, objetivu lansa formasaun lian Korea no Ingles iha Baukau atu prepara jovem sira hodi kompete ba vaga rai liur nian, tanba oras nee jovem barak hakarak kompete kampu servisu iha rai liur, maibe laiha koinhesementu lingua.
Tanba nee Asosiasaun Ramelau Oan Moris Domin iha Timor-Leste hamutuk ho Sekretariu Estadu Formasaun Profesional Munisipiu Baukau lansa formasaun refere iha Baukau atu prepara jovem sira kompete ba vaga rai liur nian liu liu ba servisu iha Korea no Australia neebe prezisa lian Ingles.
“AROMD-TL ho SEFOPE Munisipiu hamutuk iha lansamentu kursu lian Ingles ho lian Korea iha Munisipiu Baukau, entaun kuarta feira nee hahu ona durasaun kursu Ingles fulan 3 Korea fulan 6,” hateten Gaspar iha Uatulete. Baukau, Kuarta (08/10/2025).
Nia esplika, formasaun ba lian 2 nee formador nuudar Baukau oan neebe durante nee halo ona kooperasaun ho linguistiku sira iha Filipina neebe prontu ona atu hanorin formadu no formada sira neebe iha interese tuir formasaun iha AROMD-TL.
Formadu no formada sira neebe iha interse atu tuir formasaun lian Korea AROMD-TL antes nee iha ona kooperasaun ho SEFOPE, tanba nee bainhira termina formasaun durante fulan nee sei tuir teste iha SEFOPE Dili.
Maibe AROMD-TL hetan ona lisensamentu husi INDIMO, tanba nee formadu no formada neebe tuir formasaun iha AROMD-TL tenke selu kada fulan nunee iha vontade tuir formasaun hodi fo susesu ba aan rasik.
“Kriteria neebe iha mai rejistu US$ 5.00, kaos US$ 7.00 no fulan fulan pagamentu US$ 10.00 ba area rua kustu hanesan deit,” Gaspar informa.
Iha fatin hanesan, Diretor SEFOPE Munisipiu Baukau, Romualdo Antonio de Sousa konsidera, formasaun neebe lansa husi AROMD-TL iha Baukau importante tebes ba jovem sira, tanba liga ba servisu iha rai liur nian neebe bele reduz numeru dezempregu iha Munisipiu Baukau.
“Sim ita hotu hatene, agora vagas neebe mai komesa reduz ona liga ba dadus hau sente barak mak sai ona ba nasaun Korea no Australia,” Romualdo Katak.
Diretor SEFOPE Munisipiu Baukau nee relata. ezistensia Sentru Formasaun neebe produz ona jovem sira ba servisu iha Korea no Australia iha Baukau antes nee hamutuk 7 no dadaun aumenta tan AROMD-TL krese ona ba Sentru Formasaun 8 eziste iha Baukau, tanba nee husu jovem sira aproveita oportunidade hodi kapasita aan iha lian Korea no Ingles bainhira iha konhesementu klean ba lian 2 refere sei hetan oportunidade ba servisu iha rai liur.
Enkuantu formada Gabriela Asis Belo sente kontente no agradese, tanba AROMD-TL loke ramu iha Baukau hodi fasilita jovem sira neebe iha interese tuir formasaun hodi ba servisu iha rai liu,r hanesan Nasaun Korea neebe tinan barak ona presiza tebes Timoroan sira inklui lian Ingles neebe presiza mos iha Timor Leste no Nasaun Australia no Nasaun seluk tan.
“Formasaun ida nee nuudar oportunidade atu ami jovem sira, bele prepara aan bele kompete ba kampu trabalho rai laran no rai liur,” Gabriela komenta.
Entretantu AROMD-TL eziste iha Baukau loron dahuluk realiza atividade formasaun ho formadu no formada, nain 28 husi area formasaun lian Korea no Ingles.
Jornalista: Tomas Reis
Editora: Carme Ximenes
