DILI, STLTIMORLESTE.com – Manorin ida husi Ensinu Baziku Filial (EBF) Bidau Masaur, bainhira estudantes la hakerek, nia kuu estudante nee nia tilun too raan, no tuir planu familia no eskola sei tur hamutuk hodi bele rezolve asuntu nee.
Superintendente Edukasaun Munisipiu Dili, Cesarina Correia Guterres dehan, sira nia parte la haree direitamente, maibe informasaun ida nee viral iha facebook. Entaun depois de inspesaun jeral hetan tiha informasaun ida nee sira relata mai, no sira identifika katak, akontesimentu nee akontese iha EBF Bidau Masaur.
“Iha momentu neeba ita nian inspetor too kedas iha fatin hodi halao enkontru ho manorin sira. Depois profesora refere mos rekonhese katak, nia duni mak kuu estudante nee nia tilun, tanba deit labarik nee la hakerek, nee mak kuu estudante nee nia tilun,” afirma nia ba STL, Kuarta (08/10/2025).
Nia dehan, bainhira profesor nee kuu tiha estudantes nee nia tilun no profesora nee mos la sente. Estudantes nee fila tiha ba uma, depois inan aman sira mak hetan fali. Nee duni momentu neeba rezolve tiha ona no profesora ho Koordenadora nee mos mai too iha sira nia fatin hodi presta deklarasaun iha nee.
“Tuir informasaun neebe mak ami hetan husi inspetor sira katak, orsida tuku rua nunee husi parte familia no eskola atu tur hamutuk hodi koalia asuntu ida nee. Nee duni orsida rezolve ona nee los ona, profesora nee hanorin fila fali,” nia informa.
Bainhira STL hatun notisia ida nee seidauk halo konfirmasaun ho Koordenadora husi EBF Bidau Masaur no profesora refere.
Jornalista: Jacinta Sequeira
Editora : Domingas Gomes
