DILI, STLTIMORLESTE.com – Prezidente Republika (PR), Jose Ramos Horta autoriza sidadaun sira lori bandeira Palestina iha eventu Maratona Internasional Dili 2025.
Kestaun nee hatoo husi, Adjunta Xefe Kaza Sivil, Henriqueta Maria da Silva ba jornalista sira, iha palasiu Prezidensial, Nicolau Lobato, Bairo Pite, Dili, Kinta (09/10/2025).
“Hanesan horiseik hatoo ona iha konferensia imprensa hodiseik katak sei hein desizaun, ohin loron iha ona orientasaun husi sua exelensia Prezidente Republika, Jose Ramos Horta ba hotu hotu liu liu ba koredor sira neebe partisipa iha maratona Internasional 2025 laos deit hetan lisensa, maibe enkoraza atu lori atributu palestiano sira nia hanesan jestu ida neebe forte ba pas no solidaridade,”dehan Adjunta Xefe Kaza Sivil, Henriqueta.
Iha momentu ida nee mos Prezidente Republika, Jose Ramos Horta afirma, Timor Leste nia luta ba indepedensia harii iha fundasaun solidaridade internasional nian, iha esperitu ida nee mak agora hamrik hamutuk ho povu Palestina nee.
Haree koredor sira neebe lori bandeira palestina nia ka uza nia kor iha dalan sira Tema ba maratona tinan ida nee, Halai ba Palestina, hili atu reflete Timor-Leste nia kompromisu istoriku no metin ba justisa, no Pas ba povu Palestina. Ida-nee alina ho prinsipiu prinsipal sira neebe maka ita-nia nasaun harii, dehan nia.
Tanba tuir nia Timor Teste nia luta rasik ba independensia harii iha fundasaun solidariedade internasional nian. Iha espíritu hanesan nee mak agora hamriik hamutuk ho povu Palestina nian, Haree korredor sira neebe lori bandeira Palestina nian ka uza nia kor sira iha dalan sira Dili nian sei sai hanesan testamentu ida neebe emosionante umanidade neebe fahe no esperansa, koletivaba Pas ida neebe justu no duradoura. Maratona hanesan simbolu ida ba rezistensia no espíritu umanu, no laiha dalan ida neebe apropriadu liu mak atu kanaliza enerjia ida nee hodi bolu ba Pas no solidariedade.
Maratona Internasional Dili nian sempre liu fali eventu desportivu ida ida-nee maka plataforma ida atu promove Pas, saude no unidade global. Edisaun 2025 sei aproveita plataforma ida-nee hodi amplifika mensajen ida apoiu nian ba kauza ida neebe iha rezonansia klean ho povu Timor-Leste.
Maratona Internasional Dili 2025 hein atu simu partisipante lokal no internasional sira iha loron 11 Outubru 2025, ba eventu memoravel ida neebe selebra atletismu enkuantu defende valor universal sira justisa no kompaixaun nian. Mai halai ba Palestina no halai ba selebra Adezaun Timor-Leste ba ASEAN.
Maratona Internasional Dili 2025, ho tema Halai ba Palestina, ho patrosíniu husi Prezidente Republika, Jose Ramos Horta organiza iha kolaborasaun ho IX Governu Konstitusional, Ministeriu Juventude, Desportu, Arte no Kultura, no Federasaun Atletizmu Timor-Leste, afirma katak atleta no korredor sira neebe partisipa iha Maratona Internasional Dili 2025 laos deit hetan lisensa maibe enkoraja atu lori atributu palestinianu sira hanesan jestu ida neebe forte ba Pas no solidariedade.
Nunee mos Superidente Asistende, Domingos Gomes hatete, bainhira Prezidente Republika, Jose Ramos Horta autoriza ona mak polisia nasional Timor Leste mos tuir deit desizaun hotu tanba Prezidente rasik autoriza ona.
“Agora ita rona ona imformasaun katak hetan autorizasaun husi Prezidente entau Polisia Nasional Timor Leste tuir deit tanba Prezidente mak aas liu no boot liu,” dehan nia.
Jornalista: Emerenciana Pinto
Editora: Carme Ximenes
