DILI, STLTIMORLESTE.com – Kolokasaun bolsa kandidatu profesores nivel sekundariu jeral, daudaun nee sei iha faze mapamentu nia laran.
Tuir Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandes katak, kolokasaun bolsa kandidatu nivel sekundariu ninia nee agora sei halo hela mapa eskola, hotu tiha ida nee mak foin halo kolokasaun.
“Neebe ita seidauk hatene los ida, tanba agora ninia prosesu sei iha mapamentu hela. Halo mapamentu nee mak hanesan eskola halo nia mapa nee iha neebe, karik eskola nee iha aldeia, nia iha suku saida no eskola nee presiza profesor hira,” dehan nia ba STL, Kinta (09/10/2025).
Benjamin dehan, quadro pesoal nee, quadro pesoal duni, no mapamentu nee mapamentu duni, nee para hodi hatene katak, eskola nee iha suku, aldeia, postu administrativu no munisípiu. Neebe buat hirak nee hotu mak agora sei iha faze mapamentu nia laran.
Nia hatutan, nee duni kolokasaun bolsa kandidatu ba nivel sekundariu nian nee sei hein prosesu mapamentu. Buat hirak nee hotu mak foin bele halo kolokasaun ba sira. Target tinan nee halo deit, tinan nee prepara tiha depois koloka sira ba eskola nee iha inisiu do ano.
Jornalista: Jacinta Sequeira
Editora: Domingas Gomes
