DILI, STLTIMORLESTE.com – Ministeriu Edukasaun (ME) halo ona prosesu pagamentu ba konsesaun eskolar, karik semana nee seidauk tama semana oin bele tama ona iha konta bankaria Eskola Sekundariu Jeral (ESJ) publiku no privadu hamutuk 60.
Liafuan nee haktuir husi Diretor Nasional Ensinu Sekundariu iha ME, Benjamin Gomes da Cruz Fernandes ba STL, Kinta (09/10/2025).
“Konsesaun eskolar semana oin tama ona iha sira nian konta bankaria eskola sekundariu jeral, agora iha prosesu pagamentu. Nee duni konsesaun semana ida nee la tama konta, entaun semana oin hahu tama ona iha konta bankaria eskola idak-idak, liu-liu eskola sekundariu públiku no privadu hamutuk 60,” dehan nia.
Nia hatutan, karik semana nee konsesaun seidauk tama konta, entaun semana oin hahu tama ona konta bankaria eskola nian. Atribui konsesaun eskolar nee ba eskola sekundariu públiku 54 no ba eskola sekundariu privadu 6, maibe eskola sekundariu Nobel da Paz nafatin la hetan osan ida nee.
Iha fatin seluk, Diretor Eskola Sekundariu Jeral 10 de Dezembru Komoro, Manuel Verdial hatete, bainhira aumenta ho estudantes husi eskola Rainha da Paz, daudaun nee sira nian total estudantes hamutuk US$ 1,660 bainhira hatama relatóriu, atu nunee osan nee bele tama iha sira nian konta eskola ninia.
Jornalista: Jacinta Sequeira
Editora: Domingas Gomes
