DILI, STLTIMORLESTE.com – Autoridade Seguransa Polísia Nasional Timor Leste (PNTL) liu husi Diresaun Servisu Investigasaun Kriminál (DSIK) halo operasaun sobu jogu Online iha area Fatuhada no Kolmera, konsege detein sidadaun estranjeiru nain 10 iha sela polísia hodi submete ba prosesu investigasaun.
Autoridade seguransa sira hapara operasaun jogu online nee tanba bazeia ba rezolusaun governu neebe determina kanselamentu lisensas neebe fo ba operasaun jogus no apostas online sira.
Durante operasaun PNTL-DSIK fahe ba ekipa rua iha loron Kinta (09/10), tuku 11:30 kalan, konsege identifika sidadaun estranjeiru hamutuk ho trabalhador Timoroan feto no mane lubuk ida halao hela atividade jogu online iha area Fatuhada no Kolmera.
Hafoin ekipa PNTL-DSIK identifika atividade jogu online ne’e halo kedas atuasaun kaer ho liman konsege asegura detein kedas sidadaun estranjeiru nain 10 ho trabalhador Timoroan feton no mane kuaze nain 40 resin ho evidensia sira hodi transporta kedas ba edifisiu Diresaun Servisu Investigasaun Kriminal (DSIK) nia fatin iha kuartel Jerál PNTL Kaikoli, hodi submete ba prosesu indetifikasaun.
“Iha Prosesu identifikasaun nee trabalhador Timoroan feto no mane sira nee rejista hotu naran liberta kedas sira, haruka fila ba idak-idak nia uma hodi hein prosesu investigasaun, maibe sidadaun estrajeiru nain 10 inklui feto ida kontinua detein iha sela polisia hodi submete ba prosesu investigasaun, durante oras 72 nia laran, hafoin aprezenta ba Ministeriu Publiku (MP), kontinua interrogatoriu dahuluk iha Tribunal atu foti desizaun tuir lei ne’ebé vigora iha Timor Leste,” sita nota komunikadu impprensa neebe STL asesu husi media PNTL, Sesta (10/10/2025).
Sidadaun estrajeiru nain 10 neebe kumpri hela sela detensaun, kompostu husi nain 6 hanesan resposavel masimu ba jogu online iha area Fatuhada ho naran inisial BJT, AJ, JD, KK, JO no MR nee rejista ho Nuk. 0323/25.PNSIC no nain 4 neebe resposavel masimu ba jogu online iha area Kolmea ho naran inisial PG, MIS,YA no YMK, ida nee mos rejista ho Nuk. 0324/25.PNSIC.
Atividade jogu online neebe sidadaun estranjeiru loke durante nee halo rekrutamentu ba sidadaun Timoroan feto no mane hodi halo servisu utiliza telemovel ho operador Sim Card rua hanesan Telemor ho Telkomcel, hafoin manda mesajen ho maneira oin-oin ba ema seluk bele fiar sira ikus mai haruka ema manda osan ba sira nia konta bankaria hodi hetan benefisiu ba sira nia aan.
Jornalista: Alberto Menezes
Editor: Xisto Mendonça
