BAUKAU, STLTIMORLESTE.com – Autoridade Suku Uaigae iha Postu Administrativu Vemasi, Munisipiu Baukau, finaliza ona projetu husi Programa Nasional Dezenvolvimentu Suku (PNDS) tinan 2025 no tinan oin sei prioridade ba bee moos.
Xefe Suku Uaigae, Gaudensio C. Soares esplika, tinan fiskal 2025 Suku Uaigae hetan alokasaun orsamentu husi Ministeriu Administrasaun Estatal hamutuk US$ 50,720.10 neebe responde ba reabilitasaun estrada rural iha nivel Suku Uaigae.
“Tinan nee ami cor betor estrada atinji hotu ona 100% enkontru mos hotu tiha ona, exatamente nee fasilita ona komunidade sira nia movimentu iha Suku laran ba mai hamutuk metru 22,” hateten Gaudensio, Sesta (10/10/2025).
Tnan 2025 Autoridade Suku prioridade ba reabilita estrada iha Suku laran, tanba durante nee difikulta movimentasaun komunidade sira ho transporte, maibe iha tinan nee bele fasilita ona komunidade sira nia movimentasaun ho transporte.
Mezmu orsamentu PNDS tinan nee responde ona ba problema estrada, maibe bee moos nafatin sai preokupasaun ba komunidade sira, tanba nee Autoridade Suku planeia ona tinan 2026 sei tau prioridade ba programa bee moos.
“Tinan 2026 ami prioridade ba nesesidade relevante neebe ami infrenta daudaun liu liu kona-ba bee moos nian, tanba nee ami sei kanaliza ba Aldeia 2 iha Suku laran nee,” Gaudensio katak.
Nia salienta, razaun Suku prioridade ba bee moos iha tinan 2026, tanba daudaun bee moos neebe komunidade komsumu ho debitu kiik iha tempu bailoron, nunee tinan 2026 sei kanaliza bee moos husi bee matan Uaibenu no Uaidora.
Maibe antes atu kanaliza bee moos ba komunidade sira husi bee matan 2 refere sei koordena uluk ho ekipa tekniku husi PNDS haree uluk bee moos perfurasaun neebe daudaun komunidade konsumu, tanba bainhira haree mak iha posibilidade bele kontinua halo perfurasaun, sei halo hikas perfurasaun ba bee refere.
“Bee matan 2 nee planu hela, maibe prezisa tekniku sira mai observa took bee nee nia debitu iha duni benefisiu ba komunidade sira ga lae, posivel mos ami sei lori sira ba haree perfurasaun nee, koko perfurasaun tun tan ba rai okos mais ou menus bee iha ga lae, ita haree lai mak kanaliza,”dehan Gaudensio.
Jornalista: Tomas Reis
Editora: Carme Ximenes
