DILI, STLTIMORLESTE.com – Ministeriu Publiku (MP) iha alegasaun ba krimi Violensia Domestika ho Forma Ofensa Integridade Fisika Simples no krimi Arma Branka, ameasa arguidu LS ho pena prizaun tinan 2 suspende ba tinan 3, tanba konsidera komete krimi hasoru lezada SM.
Iha sala julgamentu laran arguidu deklara katak, faktus neebe konsta iha akuzasaun balu loos, arguidu rekonhese lori duni ain tebe lezada, no liman tuku lezada.
Arguidu deklara katak, faktus neebe loos maka tuku no tebe lezada, maibe konaba dehan ameasa ho tudik nee lalos.
Tanba momentu neeba lezada atu halai, arguidu mos hasai liafuan ida katak, o halai hau sona mate o, no arguidu refere ba tudik modo nian neebe rai iha uma, maibe arguidu nia liman la kaer tudik ida.
Arguidu rekonhese, iha fulan Janeiru nee arguidu baku lezada, tanba arguidu halai kareta no fila tarde mai uma lezada hasai lia fuan mal ba arguidu, ho ida nee maka arguidu nervoju hodi baku lezada.
Arguidu deklara, agora sira diak malu ona no kontinua moris hamutuk hanesan fen no laen, depois akontese problema sira mos rejolve ona tuir familia nian.
Aleinde nee Tribunal konfirma ba lezada konaba momentu arguidu ameasa lezada nee kaer buat ruma ka lae, lezada deklara rona deit maka arguidu nia lian, maibe arguidu atu kaer tudik ka lae lezada la haree ida.
Rona tiha arguidu no lezada, iha alegasaun Prokurador Napoliao da Silva deklara katak, MP akuza arguidu ho krime tolu, maibe iha julgamentu arguidu ejiste krime rua, ba iha krime ameasa lezada aseita atu dada fila.
MP konsidera, aktu arguidu nian prende duni ba iha krime rua nee, tanba nee MP husu Tribunal Kolektivu atu kondena arguidu ho Pena prizaun tinan 2 suspende ba tinan tolu.
Enkuantu defeza Henrique Mariz deklara katak, lia fuan neebe lezada hasai falta respeitu, maka ikus mai hamosu problema.
Kona-ba krimi Arma branka defeza hare katak, la iha armas ida neebe sai hanesan objeitu hodi toma pose ba arguidu, no provas la iha autu de aprensaun.
No defeza konsidera krime Arma Branka la prense, maibe konaba krimi Violensia Domestika prense tanba arguidu konfesa.
Defeza deklara, ba prosesu ida nee sira rejolve ona familia, no arguidu arepende ona nia hahalok, tanba nee husu Tribunal atu aplika Pena Admoestasaun.
Rona tiha alegasaun, Tribunal deside adia ba loron seluk hodi rona desizaun.
Tuir faktus neebe iha katak, akontese iha Bekora momentu neeba arguidu halo agresaun hasoru lezada, tanba nee maka lezada sente la diak hodi hato keixa ba iha Polisia.
Tanba nee Ministeriu Publiku akuza arguidu komete krime Violensia domestika ho forma ofensa simples, no arma branka.
Audensia julgamentu nee, prezide husi Juiz Kolektivu, Zulmira Auxiladora, no Juiz estajiadu nain rua, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Henrique Mariz.
Jornalista: Terezinha De Deus
Editora: Carme Ximenes
