DILI, STLTIMORLESTE.com – Uma kain lima (5) iha Suku Ossu de Cima, Postu Administrativu Ossu, Munisipiu Vikeke, too agora seidauk asesu ba linha eletrisidade, tanba dook husi estrada boot.
Xefi suku Ossu de Cima, Celestinho Monteiro de Carvalho hatoo kestaun nee ba jornalista STL iha Centro Conversões Dili (CCD), Sesta (10/10/2025).
“Iha Suku Ossu de Cima 98% komumidade asesu ona ba eletrisidade, hela 2% mak seidauk asesu ba eletrisidade, iha uma kain 5 lae 6 mak seidauk asesu ba linha eletrisidade, tanba dook husi vila ka estrada boot, ho ida nee mak hau nuudar Xefe Suku esforsu atu nunee ami nia komunidade sira nee bele asesu hotu ba eletrisidade,” dehan nian.
Nia mos hatoo mensajen ba parte relevante sira, liu-liu ba iha Eletrisidade Timor Leste (EDTL) buka meius atu nunee bele responde mos ba komunidade sira ninia preokupasaun nee.
“Hau nia mensajen ba Prezidente EDTL se bele rekolha dadus ba suku hotu-hotu neebe mak komunidade sira seidauk asesu ba linha eletrisidade, liu-liu iha Suku Ossu de Cima neebe mak komunidade balun seidauk hetan asesu eletrisidade, buka meius oinsa atu nunee bele responde mos ba komunidade sira ninia preokupasaun.
Iha fatin hanesan, Xefe Suku Maumeta, Postu Administrativu Bazartete, Munisipiu Likisa, Vitor da Silva dehan, populasaun iha Suku Maumeta kauze 100% asesu hotu ona ba eletrisidade.
“Kona-ba eletrisidade kuaze 100% komunidade asesu hotu too iha area rural, sira mos uza ona eletrisidade, iha neeba kuaze uma kain 8 hanesan nee mak uza deit ain hodi dada rasik ahi ba uma, maibe ladun dook,.besik hela kuaze 200 metru deit.
Nia dehan, sei prepara proposta ida ba iha EDTL,.nunee tau netik airin sanulu ba uma hitu neebe mak dada rasik ahi ba sira nia uma, nunee komunidade sira bele uza eletrisidade neebe mak ho kualidade.
Entretantu total populasaun iha Suku Ossu de Cima hamutuk 4.518, iha aldeia 8 mak hanesan Belas, Borala, Lugabuti Liamira, Umaniko, Wairuai, Belas Sorin.
Jornalista: EST 1
Editor: Xisto Mendonça
