DILI, STLTIMORLESTE.com – Komumidade iha Suku Maumeta, Postu Administrativu Bazartete, Munisipiu Likisa, kuaze 20% sosa bee moos husi kompanhia hodi konsumu loron-loron.
Xefe Suku Maumeta, Vitor da Silva hatoo kestaun nee ba jornalista STL iha Centro Conversões Dili, Sesta (10/10/2025).
“Koalia kona-ba bee moos, ami iha Likisa preokupadu tebes, ema barak mak sosa bee moos, mezmu BTL no SMASA nia edifisiu iha neeba, maibe komunidade barak mak sosa bee, agora daudaun komunidade sira balun uza BTL, maibe barak liu mak sosa bee moos husi kompanhia neebe mak faan bee, komunidade neebe mak sosa bee kuaze 20%,” dehan Vitor.
Nia tenik, daudaun nee sira fura hela bee besik sede suku, maibe daudaun nee avaria hela, nunee iha fulan Novembru bele troka bomba foun hodi bele fornese bee moos ba komunidade sira.
“Ami fura hela bee ida iha sede suku, maibe agora daudaun avaria hela, ami seidauk atu troka bomba, hanoin fulan ida nee hotu, tanba fulan Novembru ami bele troka bomba foun para bele fornese bee ba komunidade sira neebe mak besik iha sede suku,” Vitor afirma.
Nunee mos daudaun nee sira dada hela bee ida iha foho nunee bele fornese ba komunidade sira neebe mak hela iha foho nomos iha hanoin para dada tan bee ida bele fornese ba komunidade sira iha sidade laran.
Nia afirma, iha instituisaun rua mak kaer bee, ida mak BTL, ida mak SMASA. SMASA haree liu ba iha area rural, BTL haree iha vila laran, tanba nee iha area rural nee BTL nia servisu, nee PNDS labele tama iha neeba.
“Ba oin se bele karik BTL ho SMASA haree servisu hamutuk, lae ita ba ida neeba sira dehan hau la haree ba iha sidade, hau iha foho deit, ida fali dehan hau haree liu ba iha foho deit, ida nee mak nia problema,” tenik nia.
Jornalista: EST 1
Editor: Xisto Mendonça
