AINARO, STLTIMORLESTE.com – Ohin, Prezidente Republika (PR), Jose Ramos Horta halao dialogu ho komunidade sira husi Muisipiu Aileu, Ainaro, Manufahi no Kovalima ho tema “Prezidente Ramos Horta ho Povu iha Pouzada Maubisi Munisipiu Ainaro”.
Tuir Sekretariu Estadu Komunikasaun Sosial, (SEKOMS), Expedito Dias Ximenes ba STL iha Pouzada Maubisse, Segunda (13/10/2025) katak, ohin Ajensia Notisia Tatoli halao programa ida naran hakbesik, ho ninia konotasaun nee, Tatoli hanesan media kanal estadu nian, hakarak hakbesik ba nia komunidade liiu husi ninia informasaun.
“Ohin Tatoli konvida Prezidente Autoridade Munisipiu Manufahi, Kovalima, Ainaro nomos Aileu, mai halo programa Televizivu ida, liu husi live streaming, Prezidente Autoridade Munisipiu nain 4 nee, ita koalia kona-ba sira nia preparativus ba Desentralizasaun Administrasaun no poder lokal. Hau hanesan SEKOMS, sente haksolok tanba programa ida nee ba ita hotu nomos ba publiku katak, Prezidente Autoridade sira programa direita no publiku bele akompanha ho sira nia dezafiu neebe sira hasoru inklui sira nia pedidu ba governu , liu-liu ba Ministeriu Administrasaun Estatal neebe hanesan orgaun estadu nian neebe tau matan ba Desentralizasaun Administrasaun no Poder Lokal,” dehan SEKOMS, Expedito Dias Ximenes.
Nia haktuir tan katak, ohin hatoo mos media nia knaar nudar sensibilizasaun, desiminasaun informasaun ba politika governu ba iha preparativus Desentralizasaun Administrasaun no poder lokal.
Programa Hakbesik nee sei kontinua ba iha Munisipiu Baucau, konvida Prezidente Autoridade Munisipiu Viqueque, Lautem, Baucau nomos Manatuto, ho formatu hanesan, oinsa sira nia preparativus, protidaun, sira nia dezafius no sira nia pedidu ba iha governu sentral kona ba Desentralizasaun Administrasaun no Poder lokal.
Dialogu Komunitariu nee, Xefe Estadu, Jose Ramos Horta, aprezenta nia perspetiva kona ba Dezenvolvimentu Nasional no rona mos preokupasaun husi autoridade munisipal no komunidade Postu Maubisi.
Inisiativa halao eventu nee, nuudar programa TATOLI hakbesik husi Ajensia Notisioza Timor-Leste, TATOLI, I.P atu hakbesik Xefe Estadu ba iha povu nia leet.
Atividade nee, organiza husi TATOLI, I.P, servisu hamutuk ho Administrador Postu Administrativu Maubisse no hetan apoia husi AQUAFU Company, East Timor Trading Group no TELEKOMCEL.
Progama nee halao iha Pouzada Maubisse, iha Segunda, 13 Outubru 2025, hahu husi tuku 15h00 too 16h30, transmite direta liuhusi plataforma Facebook ANTIL no Youtube, TATOLI, I.P.
Jornalista: Joseph Koa
Editor: Joseph Koa
