DILI, STLTIMORLESTE.com – Ministru Juventude Desportu Arte no Kultura (MJDAK), Nelio Isac Sarmentu hatete, joven sira halimar Facebook oras rua tolu sei la manan buat ida, importante mak kapasita aan liu husi formasaun sira nunee aban bain rua bele troka lideransa tuan sira.
Nia dehan, joven sira tenke prepara aan iha konhesimentu kritika, no bele kontribui ba nasaun, tanba joven sira mak kontinuador lori nasaun nee ba oin hanesan nova jerasaun foun nasaun nian, tenke preparadu ona.
Timor Leste (TL) hanesan nasaun indepedente joven sira hotu presiza kontribui, se atu kontribui tenke ho aprende neebe diak iha moris nee nunee bele prepara aan aban bainrua bele troka lideransa tuan sira.
”Importante mak sira nee fo sira nia tempu tomak atu aprende, hau halo komparasaun se ita uza deit oras rua tolu iha facebook ita lakon buat barak nee negativu pozetivu ita lakon maibe maibe se ita lakon oras rua ka tolu aprende buat neebe ita forma aan signifika katak pozetivu, tanba nee mak sira forma sira nia aan iha kedas inisiu aban bainrua sira hetan oportunidade sai hanesan lider ka ou servisu iha fatin ruma karik sira iha duni vontade atu serbisu ba sira nia rai,” dehan Nelio Isac ba jornalista sira , iha Palasiu Prezidensial, Nicolau Lobato, Bairru Pite, Dili, Segunda (13/10/2025).
Governante nee mos husu jerasaun foun sira, atu hanoin neebe pozetivu nunee aprende nafain hodi lori rai nee ba oin.
“Oportunidade mak ida nee kontinua aprende hanoin pozetivu tanba dala ruma ita hanoin mak negative deit ita lahetan buat neebe mak ita hakarak alkansa ita forma ita nia karakter ita nia aan rasik, mai ho hanoin pozetivu hau hanoin mai ho hanoin pozetivu hanoin neebe mak diak ho aprende buat neebe pozetivu, aprende buat neebe imi lahetan iha edukasaun formal bele forma imi nia karakter, atu sai ema neebe hadomi nia rai no aban bainrua hetan oportunidad,e imi sai lider ruma karik ou hetan oportunidade serbisu iha fatin ruma karik bele halo serbisu bai ta nia povu nee,” dehan governante nee.
Jornalista: Emerenciana Pinto
Editora: Carme Ximenes
