BAUKAU, STLTIMORLESTE.com – Agrikultores sira iha Suku Kaibada, Postu Administrativu Baukau Vila, Munisipiu Baukau sente preokupadu, tanba Timor Leste (TL) iha natar barak, maibe tinan naruk ona konsumu foos importasaun.
Agrikultores Aníbal Cardoso de Sá hateten, Timor Leste la presiza depedensia produtu foos husi nasaun seluk, tanba Timor Leste iha natar barak, maibe depedensia ba foos importadu, tanba natar barak iha territoriu nasional inklui iha Suku Kaibada maioria abandona.
“Natar kuandu husi hanesan nee ami sente triste, tanba durante ita hola fos pendente fali husi rai liur mai, mais ita nia natar barak abandona tiha fali,” Aníbal informa iha Uanioma Kaibada, Tersa (14/10/2025).
Tuir nia, natar barak iha Timor-Leste abandona, tanba la asesu bee neebe impaktu husi irigasaun aat inklui bee matan moris sira debitu kiik la responde ba natar sira.
Maibe natar sira iha Suku Kaibada barak abandona, tanba durante nee asesu bee husi bee matan Uailia, maibe daudaun labele fo asesu bee ba natar, tanba bee matan refere debitu hahu menus.
“Se irigasaun la diak fo impaktu ba ami Agrikultura, tanba se irigasaun diak natar bele halai ema bele halo hortikultura. Dala barak ita haree atu reduz, maibe ita nia natar barak abandona hanesan nee oinsa mak ita atu reduz fo husi rai liur mai,” Aníbal argumentu.
Iha fatin hanesan, Xefe Suku Kaibada Cosme da Costa Lopes rekoinhese, natar iha Suku Kaibada hamutuk hektares 80 kuaze abandona ona tinan 6, tanba impaktu husi irigasaun.
“Iha Suku Kaibada ita konta husi Aldeia Uanioma nian kuaze hamutuk 80 hektares abandona, tanba bee nee mak seidauk responde ba natar sira entaun ita mos planu ona orsamentu PNDS nian ba oin kria kondisaun fatin irigasaun nian oinsa konversa bee nee hodi fasilita ba ita nia komunidade Agrikultura nian,” Cosme argumentu.
Autoridade Suku nee salienta, parte Suku planeia ona sei utiliza Orsamentu husi Programa Nasional Dezenvolvimentu Suku (PNDS) tinan 2026 nian hodi konstrui irigasaun tradisional no halo korservasaun ba bee hodi fo benefisiu hikas ba natar hirak neebe daudaun abandona, tanba natar hirak nee abandona kauza husi bee matan Uailia debitu kiik no kondisaun irigasaun la responde hodi fo asesu bee ba natar.
Jornalista: Tomas Reis
Editora: Carme Ximenes
