DILI, STLTIMORLESTE.com – Tinan nee Instituto Ciensia Saude (ICS) sei simu kandidatu lisensiatura ba iha departamentu parteira, farmacia no nutrisaun.
Lia hirak nee hatete husi Reitor ICS, Leao Borges ba jornalista STL, Tersa (14/10/2025).
Nia dehan, agora sei iha prosesu, tanba husi MESSK iha tempu badak nia laran sei tun mai halo fila-fali avaliasaun.
“Nunee tinan nee ami bele simu ona lisensiatura, hanesan departamentu parteira ninia, farmacia no nutrisaun, nee ami bele simu ona kandidatu lisensiatura nian, tanba hetan ona aprovasaun husi MESSK,” dehan Leao.
Nia afirma, agora dosente neebe ho grau lisensiatura nee depende sira no labele obriga, tanba nee depende ba sira, maibe agora iha 11 mak kontinua sira nian maestradu iha Indonezia, balun besik atu gradua ona no balun hakerek daudaun besik atu finaliza ona.
“Ami nian dosentes iha nain neen tan, nain rua ba ona Portugal, nain haat atu ba tan Brazil, sira nain 11 iha Indonezia,” nia informa.
Iha fatin ketak, Reitor Dili Institute Of Technology (DIT), Salustiano dos Reis Piedade katak, dosente DIT neebe mak estudu iha rai liur iha nain 17. Husi 17 nee, nain tolu estuda iha Portugal, nain hat estuda iha Brazil, nain 10 estuda iha Indonesia. Sira kontinua estudu iha area petroliferu, negosiasaun nomos ba lingua portugues no inglesh.
Nia dehan, tanba MESSK nian preokupasaun ida maka atu dezenvolve diak liu tan lingua português nee, entaun haruka dosentes sira nee balun ba estudu iha lingua português ninia, maibe sira neebe ba Indonesia nee iha area inglesh, maibe barak liu maka ba iha lingua português.
Jornalista: Jacinta Sequeira
Editora: Domingas Gomes
