DILI, STLTIMORLESTE.com – Ministeriu Publiku (MP) iha alegasaun ba krimi Arma Branka, solisita ba iha Tribunal Koletivu atu absolve arguidu MMJ, tanba konsidera la provadu ba iha krimi nee hasoru lezadu AH.
Prosesu nee iha krime rua, ba krime Ofensa Simples lezadu aseita hodi dada fila, tanba nee Tribunal kontinua julga arguidu ba iha krime Arma Branka.
Iha alegasaun nee, Prokuradora Bemvinda do Rozario deklara katak, antes nee lezadu hatoo deklarasaun iha Ministeriu Publiku oin seluk, maibe iha Tribunal lezadu deklara oin seluk.
Prokuradora deklara, iha Tribunal lezadu deklara katak, momentu neeba lezadu maka kaer katana, no arguidu la lori katana taa ba lezadu, maibe arguidu no lezadu hadau malu katana, no ikus mai lezadu nia alin ba sori netik.
Tanba nee Ministeiru Publiku (MP) haree katak, la prense ba iha elementu krime Arma Baranka, tanba nee husu Tribunal atu absolve arguidu.
Defeza deklara katak, iha sala julgamentu laran, arguidu mos deklara, momentu neeba arguidu konduz motor atu ba sira nia uma, iha dalan hare lezadu fera hela ai, lezadu maka provoka uluk arguidu lori katana atu taa arguidu, ho ida nee maka arguidu hakuak lezadu atu hadau katana, no ikus mai lezadu nia alin maka konsege hadau katana husi lezadu.
Tanba nee defeza, Marcal Mascarinhas deklara katak, la provadu ba akuzasaun neebe iha, tanba nee husu Tribunal atu absolve arguidu.
Rona tiha alegasaun, Tribunal adia ba loron seluk hodi rona desizaun.
Tuir akuzasaun katak, iha loron 10 fulan Junhu 2021, oras tuku 17:00 Otl, iha aldeia Anin Fuik-Dili, wainhira lezado fera ai maran atu sunu, arguidu ho motorizada mosu ba para kedas iha lezadu nia oin.
Nunee arguidu tolok kedas lezadu no imediata arguidu hodi kapaseti neebe nia kaer tuku kedas ba lezadu nian ulun parte loos, rezulta kanek no ran sai.
Arguidu kontinua ho nian aktu, tuku lezadu nian hirus matan dala ida, halo lezadu monu ba rai, maibe arguidu kaer lezadu nian faru kakorok hodi hit sae fali.
Wainhira lezadu hamrik tiha, arguidu hodi liman rua habit lezadu nian kakorok, nunee arguidu foti katana atu koa lezadu nian kakorok, maibe tanba testemunha Dorelia Joana Fania Natalia da Costa (Sara) tanis hakilar, hodi ba hadau tiha katana husi arguidu.
Nunee lezadu ba balo kedas keixa iha Polisia. Konsekuensia husi arguidu nian hahalok, halo lezadu hetan kanek no ran iha nian ulun, no mos moras iha nia hirus matan.
Tanba nee konstitui arguidu nuudar autoria material ba krime Ofensas integridade fizika Simples no mos utilizasaun ba Arma Branka neebe previstu tuir artigo 145 husi lei numeru 5/2017.
Audensia julgamentu nee, prezide husi Juiz Koletivu, Jose Escurial, Fransisca Cabral, Juiz estajiadu nain ida, Ministeriu Publiku reprezenta husi Prokuradora, Bemvinda do Rosario, arguidu hetan asistensia legal husi Defensor Publiku, Marsal Mascarinhas.
Jornalista: Terezinha De Deus
Editora: Carme Ximenes
