DILI, STLTIMORLESTE.com – Eskola 8 neebe lokaliza iha Munisípiu Dili, bainhira udan sempre sai risku ba inundasaun.
Superintendente Edukasaun Munisipiu Dili, Cesarina Correia Guterres dehan, eskola neebe iha tempu udan hetan inundasaun iha 8.
“Hau hakarak atu informa, eskola neebe iha tempu udan hetan inundasaun mak hanesan eskola EBF Hudi Laran, ESG 5 de Maio Becora, Eskola EBF Casnafar, EBF Beduku, sei iha tan EBF Metiaut, Hera, Eskola Sekundariu Jeral no 4 de Setembru Balide, no Eskola Sekundariu Jeral Finantil,” dehan nia ba STL, Tersa (14/10/2025).
Iha fatin seluk Diretor Eskola Sekundariu Jeral 4 Setembru Balide, Sergio A. da Cruz hatete, inundasaun nee bee husi estrada mak mai iha areador eskola. Valeta sira nee nakonu tiha hotu, tanba nee bee husi estrada hakarak ka lakohi tama mai fali eskola, ho ida nee mak sala 8 nee afeita ba inundasaun iha tempu udan.
“Inundasaun nee eskola sempre hetan problema mak sala 8 nee bele dehan, bee nalihun iha turma laran,” dehan nia.
Nia dehan, kona-ba asuntu ida nee hatoo ona ba iha Sekretariu Estadu ME nian, atu labele hare hela deit ba problema neebe mak mosu iha tinan-tinan, maibe pelumenus buka solusaun atu rezolve.
Jornalista: Jacinta Sequeira
Editora: Domingas Gomes
